തിരുവിതാംകൂര് ദേവസ്വം ബോര്ഡ് പ്രസിഡന്റായി കെ ജയകുമാറിനെ നിയമിച്ചു
തിരുവനന്തപുരം: തിരുവിതാംകൂര് ദേവസ്വം ബോര്ഡ് പ്രസിഡന്റായി കെ ജയകുമാറിനെ നിയമിച്ചു. ഇതുസംബന്ധിച്ച ഉത്തരവ് സംസ്ഥാന സര്ക്കാര് പുറത്തിറക്കി. വെള്ളിയാഴ്ച മുതലാണ് ഉത്തരവ് പ്രാബല്യത്തില് വരിക. രണ്ടുവര്ഷത്തേക്കാണ് നിയമനം. മുന് മന്ത്രി കെ രാജുവിനും ദേവസ്വം ബോര്ഡ് അംഗമായി നിയമനം നല്കിയിട്ടുണ്ട്.
ശബരിമല സ്വര്ണക്കൊള്ളയുമായി ബന്ധപ്പെട്ട് വലിയ തരത്തിലുള്ള വിവാദം ഉയര്ന്നു സാഹചര്യത്തിലാണ് രാഷ്ട്രീയത്തിന് പുറത്തു നിന്നൊരാളെ പ്രസിഡന്റാക്കാനുള്ള തീരുമാനമെടുത്തത്. സ്വര്ണക്കൊള്ള വിവാദം ഉയര്ന്നുവന്ന സാഹചര്യത്തില് ജയകുമാറിനെപോലെ പരിചയസമ്പന്നനായ ഒരാള് പ്രസിഡന്റാകുന്നത് ഗുണകരമാവുമെന്നാണ് സിപിഎം സംസ്ഥാന സെക്രട്ടേറിയറ്റിന്റെ വിലയിരുത്തല്.
ശബരിമലയിലെ സ്പെഷ്യല് കമ്മീഷണര് അടക്കമുള്ള സുപ്രധാന പദവികള് ജയകുമാര് വഹിച്ചിട്ടുണ്ട്. പ്രശസ്ത എഴുത്തുകാരനും ചലച്ചിത്ര ഗാനരചയിതാവുമായ ജയകുമാര് ടൂറിസം സെക്രട്ടറി, തുഞ്ചത്തെഴുത്തച്ഛന് മലയാള സര്വകലാശാല വൈസ് ചാന്സലര്, കേരള സ്റ്റേറ്റ് ഫിലിം ഡവലപ്മെന്റ് കോര്പറേഷന് എംഡി, എം ജി യൂണിവേഴ്സിറ്റി രജിസ്ട്രാര് തുടങ്ങിയ പദവികള് വഹിച്ചിട്ടുണ്ട്.
