വെറും വയറ്റിൽ നെല്ലിക്ക കഴിച്ചു നോക്കൂ; ആരോഗ്യത്തിന് മൂന്ന് പ്രധാന ഗുണങ്ങൾ

വെറും വയറ്റിൽ നെല്ലിക്ക കഴിച്ചു നോക്കൂ; ആരോഗ്യത്തിന് മൂന്ന് പ്രധാന ഗുണങ്ങൾ

കോഴിക്കോട്: ദഹനപ്രശ്നങ്ങളും അകാരണ ക്ഷീണവും ഇടയ്ക്കിടെയുള്ള ജലദോഷവും ബുദ്ധിമുട്ടുണ്ടാക്കുന്നവർക്ക് പരിഹാരം വളരെ അടുത്താണ് — അടുക്കളയിലാണ്. ഓരോ ദിവസവും രാവിലെ വെറും വയറ്റിൽ ഒരു നെല്ലിക്ക കഴിക്കുന്നത് ആരോഗ്യത്തിൽ ഗണ്യമായ മാറ്റങ്ങൾ ഉണ്ടാക്കുമെന്ന് ഫംഗ്ഷണൽ മെഡിസിൻ ന്യൂട്രീഷനിസ്റ്റ് കരിഷ്മ ചൗള പറയുന്നു.

വെറും വയറ്റിൽ നെല്ലിക്ക കഴിക്കുമ്പോൾ ലഭിക്കുന്ന പ്രധാന ഗുണങ്ങൾ താഴെപ്പറയുന്നതുപോലെ:

പ്രതിരോധശേഷി വർധിപ്പിക്കുന്നു:
വൈറ്റമിൻ സി സമൃദ്ധമായി അടങ്ങിയിരിക്കുന്ന നെല്ലിക്ക വെറും വയറ്റിൽ കഴിക്കുമ്പോൾ ശരീരം അതിനെ വേഗത്തിൽ ആഗിരണം ചെയ്യുന്നു. ഇതുവഴി പ്രതിരോധ കോശങ്ങൾ കൂടുതൽ സജീവമാകുകയും അണുബാധകളെ തടയാൻ സഹായിക്കുകയും ചെയ്യുന്നു.

വീക്കം കുറയ്ക്കുന്നു:
ശരീരത്തിൽ ഉണ്ടാകുന്ന സ്ഥിരവീക്കം പ്രതിരോധശേഷിയെ ബാധിക്കുന്നതായി പഠനങ്ങൾ സൂചിപ്പിക്കുന്നു. നെല്ലിക്കയിലെ ആന്റി-ഓക്സിഡന്റുകളും മറ്റ് സംയുക്തങ്ങളും ഈ വീക്കം കുറയ്ക്കുന്നതിൽ പ്രധാന പങ്ക് വഹിക്കുന്നുവെന്നാണ് വിദഗ്ധരുടെ അഭിപ്രായം.

ദഹനം മെച്ചപ്പെടുത്തുന്നു:
ദഹനപ്രക്രിയക്ക് ആവശ്യമായ ഗ്യാസ്ട്രിക് ജ്യൂസുകളുടെ സ്രവം വർധിപ്പിക്കുന്നതിലൂടെ നെല്ലിക്ക ദഹനക്ഷമത ഉയർത്തുന്നു. ഇതോടെ പോഷകങ്ങൾ ശരീരത്തിൽ കൂടുതൽ ആഗിരണം ചെയ്യപ്പെടുകയും മലബന്ധം പോലുള്ള പ്രശ്നങ്ങൾ ലഘൂകരിക്കപ്പെടുകയും ചെയ്യുന്നു.

എന്നിരുന്നാലും എല്ലാവർക്കും നെല്ലിക്ക ഒരുപോലെ ഗുണകരമെന്നില്ല. അസിഡിറ്റി, അൾസർ, റീഫ്ലക്സ് പ്രശ്നങ്ങൾ ഉള്ളവർ, രക്തസമ്മർദ്ദം കുറഞ്ഞവർ, പ്രമേഹത്തിന് മരുന്ന് കഴിക്കുന്നവർ (ഷുഗർ ലെവൽ പെട്ടെന്ന് ഇടിയാൻ സാധ്യത), നിർജ്ജലീകരണ സാധ്യതയുള്ളവർ എന്നിവർ നെല്ലിക്ക ഉപയോഗിക്കുമ്പോൾ ജാഗ്രത പുലർത്തേണ്ടതാണെന്ന് നിർദ്ദേശിക്കുന്നു.

നെല്ലിക്ക പച്ചയായി കഴിക്കാനോ, ജ്യൂസ് രൂപത്തിൽ ഉപയോഗിക്കാനോ, സ്മൂത്തി അല്ലെങ്കിൽ ജ്യൂസുകളിൽ ചേർത്തോ ഉൾപ്പെടുത്താനോ കഴിയും.