അതിഥി തൊഴിലാളികളുടെ മക്കളോടുള്ള വിവേചനം ഭരണഘടനയോടുള്ള വെല്ലുവിളി; കുറ്റക്കാർക്കെതിരെ കർശന നടപടി വേണം: ഇബ്രാഹിം ആറങ്ങോട്ടുകര
പാലക്കാട്: തൊഴിൽ തേടി കേരളത്തിലെത്തിയ അതിഥി തൊഴിലാളികളുടെ മക്കളെ വിദ്യാഭ്യാസ സ്ഥാപനങ്ങളിൽ വിവേചനത്തിനും അപമാനത്തിനും വിധേയരാക്കുന്നത് ഒരു തരത്തിലും അംഗീകരിക്കാനാകില്ലെന്നും, കഞ്ചിക്കോട് ഗവ. വൊക്കേഷണൽ ഹയർ സെക്കന്ററി സ്കൂളിൽ കുട്ടികൾ നേരിടേണ്ടിവന്നതായി പുറത്തുവന്ന വിവേചനപരമായ സംഭവത്തിൽ സമഗ്രമായ അന്വേഷണം നടത്തി കുറ്റക്കാർക്കെതിരെ കർശന നടപടി സ്വീകരിക്കണമെന്നും യങ് ഡെമോക്രാറ്റ്സ് പാലക്കാട് ജില്ലാ കൺവീനർ ഇബ്രാഹിം ആറങ്ങോട്ടുകര ആവശ്യപ്പെട്ടു.
കുട്ടികളുടെ ജനനസ്ഥലം, ഭാഷ, വേഷം, കുടുംബത്തിന്റെ സാമൂഹികമോ സാമ്പത്തികമോ ആയ പശ്ചാത്തലം എന്നിവയുടെ പേരിൽ അവരോട് വ്യത്യസ്തമായ സമീപനം സ്വീകരിക്കുന്നത് കേവലം ഒരു സ്കൂൾതല വീഴ്ചയായി കാണാനാകില്ല. അത് ഇന്ത്യൻ ഭരണഘടന ഉയർത്തിപ്പിടിക്കുന്ന സമത്വത്തിന്റെയും സാമൂഹിക നീതിയുടെയും മനുഷ്യാന്തസ്സിന്റെയും അടിസ്ഥാന മൂല്യങ്ങളെ ചോദ്യം ചെയ്യുന്ന നടപടിയാണ്. ഭരണഘടനയുടെ 14- ാംഅനുച്ഛേദം എല്ലാവർക്കും നിയമത്തിന് മുന്നിൽ തുല്യത ഉറപ്പുനൽകുമ്പോൾ, 15-ാം അനുച്ഛേദം മതം, വംശം, ജാതി, ലിംഗം, ജനനസ്ഥലം എന്നിവയുടെ അടിസ്ഥാനത്തിലുള്ള വിവേചനം നിരോധിക്കുന്നുണ്ട്.
കേരളത്തിലെ വിദ്യാലയങ്ങൾ കുട്ടികൾക്ക് ഭയമില്ലാതെ പഠിക്കാനും വളരാനും കഴിയുന്ന ഇടങ്ങളാകണം. എന്നാൽ അധ്യാപകരുടെയോ ജീവനക്കാരുടെയോ ഭാഗത്തുനിന്നുള്ള വിവേചനപരമായ പെരുമാറ്റം കാരണം ഒരു കുട്ടിക്ക് സ്കൂളിൽ പോകാൻ പോലും മടിയുണ്ടാകുന്ന സാഹചര്യം സൃഷ്ടിക്കപ്പെടുന്നുവെങ്കിൽ അത് സമൂഹം അതീവ ഗൗരവത്തോടെ കാണണം. ഒരു കുട്ടിയുടെ ആത്മാഭിമാനം തകർക്കുന്ന ഒരു വാക്കുപോലും വിദ്യാഭ്യാസത്തിന്റെ പേരിൽ ന്യായീകരിക്കാനാകില്ല.
കേരളത്തിന്റെ നിർമാണ മേഖലയിലും സമ്പദ്‌വ്യവസ്ഥയുടെ വിവിധ മേഖലകളിലും തൊഴിൽ രംഗത്തും നിർണായക പങ്കുവഹിക്കുന്നവരാണ് അതിഥി തൊഴിലാളികൾ. സ്വന്തം നാടും കുടുംബവും വിട്ട് കേരളത്തിലെത്തി അധ്വാനിക്കുന്ന അവരുടെ മക്കൾക്കും കേരളത്തിലെ മറ്റേതൊരു കുട്ടിക്കും ലഭിക്കുന്നതുപോലെ തുല്യമായ വിദ്യാഭ്യാസ അവകാശവും സുരക്ഷയും മാന്യതയും ഉറപ്പാക്കേണ്ടത് സർക്കാരിന്റെയും വിദ്യാഭ്യാസ സംവിധാനത്തിന്റെയും ഉത്തരവാദിത്വമാണ്.
സംഭവത്തിൽ നിഷ്പക്ഷവും സമഗ്രവുമായ അന്വേഷണം നടത്തി യഥാർത്ഥ വസ്തുതകൾ പുറത്തുകൊണ്ടുവരണം. കുറ്റക്കാരെന്ന് കണ്ടെത്തുന്നവർക്കെതിരെ യാതൊരു രാഷ്ട്രീയമോ സ്ഥാപനപരമോ ആയ ഇടപെടലുകൾക്കും വഴങ്ങാതെ നിയമാനുസൃതമായി കർശന നടപടി സ്വീകരിക്കണം. കുട്ടികളോടുള്ള വിവേചനം മറച്ചുവയ്ക്കുകയോ ലഘൂകരിക്കുകയോ ചെയ്യുന്നത് ഇത്തരം പ്രവണതകൾക്ക് കൂടുതൽ പ്രോത്സാഹനം നൽകും.
വിദ്യാഭ്യാസ സ്ഥാപനങ്ങളിൽ ജാതി, മതം, ഭാഷ, ജനനസ്ഥലം, സാമ്പത്തിക സ്ഥിതി എന്നിവയുടെ പേരിലുള്ള യാതൊരു വിവേചനവും അനുവദിക്കാത്ത തരത്തിൽ കർശനമായ മാർഗനിർദേശങ്ങൾ നടപ്പാക്കണമെന്നും അധ്യാപകർക്കും ജീവനക്കാർക്കും നിർബന്ധിത ബോധവൽക്കരണം നൽകണമെന്നും ഇബ്രാഹിം ആറങ്ങോട്ടുകര ആവശ്യപ്പെട്ടു.
കുട്ടികളുടെ അവകാശവും ആത്മാഭിമാനവും സംരക്ഷിക്കുക എന്നത് സർക്കാരിന്റെ ഔദാര്യമല്ല; ഭരണഘടന ഉറപ്പുനൽകുന്ന അവകാശമാണ്. അതിഥി തൊഴിലാളികളുടെ മക്കളാണെന്ന ഒറ്റ കാരണത്താൽ ഒരു കുട്ടിക്കും അവകാശങ്ങൾ നിഷേധിക്കപ്പെടുന്ന സാഹചര്യം കേരളത്തിൽ ഉണ്ടാകരുതെന്നും ഇബ്രാഹിം ആറങ്ങോട്ടുകര പ്രസ്താവനയിൽ പറഞ്ഞു.
