പോലീസിനെ ആക്രമിക്കാൻ ശ്രമിച്ച് രക്ഷപ്പെട്ട കാപ്പാ പ്രതി കൈനി കിരൺ പിടിയിൽ
തിരുവനന്തപുരം: വെട്ടുകത്തി ഉപയോഗിച്ച് പൊലീസിനെ ആക്രമിക്കാൻ ശ്രമിച്ച ശേഷം രക്ഷപ്പെട്ട കാപ്പാ കേസ് പ്രതി കൈനി കിരൺ പിടിയിൽ. നാല് മണിക്കൂർ നീണ്ട തെരച്ചിലിനൊടുവിലാണ് ആര്യങ്കോട് പൊലീസ് പ്രതിയെ പിടികൂടിയത്. വധശ്രമവും നാടുകടത്തൽ ഉത്തരവ് ലംഘിച്ചതും ഉൾപ്പെടെ പുതുതായി കേസുകൾ രജിസ്റ്റർ ചെയ്തതായി പൊലീസ് പറഞ്ഞു.
രണ്ടാഴ്ച മുമ്പ് സമൻസ് നൽകാനെത്തിയ പൊലീസ് ഉദ്യോഗസ്ഥർക്കു നേരെ കിരൺ വെട്ടുകത്തി വീശിയ സംഭവത്തിന്റെ ദൃശ്യങ്ങൾ മാധ്യമങ്ങളിൽ വന്നിരുന്നു. 27 കാരനായ കിരൺ എട്ടോളം ക്രിമിനൽ കേസുകളിൽ പ്രതിയാണ്. നിരന്തരമായ കുറ്റകൃത്യങ്ങളെത്തുടർന്ന് ജില്ല കലക്ടർ കിരണിനെ കാപ്പാ നിയമപ്രകാരം നാടുകടത്തിയിരുന്നു.
ഇന്നലെ രാത്രി കിരൺ ആര്യങ്കോട് വീട്ടിൽ എത്തിയ വിവരം ലഭിച്ചതിനെ തുടർന്ന് പൊലീസ് രാത്രി മുതൽ തന്നെ തിരച്ചിൽ ശക്തമാക്കി. ഇന്ന് പുലർച്ചെ എസ്.എച്ച്.ഒ തൻസീം അബ്ദുൽ സമദിന്റെ നേതൃത്വത്തിലുള്ള സംഘം കിരണിന്റെ വീട് വളഞ്ഞു. അപ്പോൾ വെട്ടുകത്തി പിടിച്ച് പുറത്ത് വന്ന കിരൺ പൊലീസ് സംഘത്തെ ആക്രമിക്കാൻ ശ്രമിച്ചു. എസ്എച്ച്ഒ ഒഴിവാക്കി മാറിയതിനാൽ ആക്രമണം പരാജയപ്പെട്ടു.
ആക്രമണം തുടർന്ന സാഹചര്യത്തിൽ എസ്എച്ച്ഒ സർവീസ് റിവോൾവർ ഉപയോഗിച്ച് കിരണിന് നേരെ വെടിയുതിർന്നു. വെടിയുണ്ട പ്രതിയെ തൊട്ടില്ല. തുടർന്ന് കിരൺ വെട്ടുകത്തി ഉപേക്ഷിച്ച് ഓടി രക്ഷപ്പെട്ടു. തുടർന്നുള്ള ഊർജിതമായ തിരച്ചിലിലൂടെ ആര്യങ്കോട് പൊലീസ് കിരണിനെ പിടികൂടുകയായിരുന്നു.
