ഉറക്കമുണർന്നാൽ ശരീരവേദനയോ മരവിപ്പോ?; നിസാരമെന്ന് കരുതരുത്, പിന്നിൽ ഉണ്ടാകാം ഈ കാരണങ്ങൾ
ഉറക്കമുണർന്നതിന് പിന്നാലെ ശരീരത്തിൽ കടുത്ത വേദനയോ മരവിപ്പോ അനുഭവപ്പെടുന്നത് പലർക്കും പതിവായ പ്രശ്നമാണ്. കഴുത്ത് വേദന, പുറംവേദന, സന്ധിവേദന തുടങ്ങിയവയിലൊന്നായാലും അത് ദിനത്തിന്റെ തുടക്കത്തിൽ തന്നെ ഉന്മേഷം നഷ്ടപ്പെടുത്താൻ ഇടയാക്കും. ചിലർ ഇത് വാർദ്ധക്യത്തിന്റെയോ അമിതമായ അധ്വാനത്തിന്റെയോ ഫലമെന്നു കരുതി അവഗണിക്കാറുണ്ട്. എന്നാൽ വിദഗ്ധരുടെ അഭിപ്രായത്തിൽ, പലപ്പോഴും ഇത് നമ്മുടെ ഉറക്കശീലങ്ങൾ, ശരീരഭാവം, പ്രഭാത ദിനചര്യ തുടങ്ങിയവയുമായി ബന്ധപ്പെട്ട പ്രശ്നങ്ങളാകാം.
ഉറങ്ങുന്ന രീതിയിലാണ് പ്രധാനമായും പ്രശ്നം തുടങ്ങുന്നത്. കമിഴ്ന്ന് ഉറങ്ങുക, ശരിയായ പിന്തുണയില്ലാത്ത തലയിണ ഉപയോഗിക്കുക, മെത്തയുടെ ഗുണനിലവാരം കുറവ് എന്നിവ നട്ടെല്ലിന്റെ സ്വാഭാവിക വിന്യാസം തെറ്റിക്കാൻ ഇടയാക്കും. ഇതുവഴി കഴുത്തിലും പുറകിലും സന്ധികളിലും വേദന ഉണ്ടാകാൻ സാധ്യത കൂടുതലാണ്. വിദഗ്ധർ പറയുന്നതുപോലെ, നട്ടെല്ലിന് ആവശ്യമായ പിന്തുണ നൽകുന്ന മെത്തയും തലയിണയും തിരഞ്ഞെടുക്കുന്നത് ഇത്തരം പ്രശ്നങ്ങൾ കുറയ്ക്കാൻ സഹായിക്കും.
കിടക്കയിൽ നിന്ന് പെട്ടെന്ന് ചാടി എഴുന്നേൽക്കുന്നതും ശരീരവേദനയ്ക്ക് കാരണമാകുന്ന മറ്റൊരു ശീലമാണ്. ഉറക്കത്തിനിടെ വിശ്രമിച്ചിരുന്ന പേശികളെയും സന്ധികളെയും അപ്രതീക്ഷിതമായി ചലിപ്പിക്കുമ്പോൾ പിരിമുറുക്കവും കാഠിന്യവും അനുഭവപ്പെടാം. അതിനാൽ കിടക്കുന്ന നിലയിൽ നിന്ന് ഇരിക്കുന്ന നിലയിലേക്ക് മാറാൻ കുറച്ച് സമയം എടുക്കുകയും, എഴുന്നേൽക്കുന്നതിന് മുമ്പ് കൈകൾ, കഴുത്ത്, പുറം തുടങ്ങിയ ഭാഗങ്ങൾ സാവധാനം വലിച്ചുനീട്ടുകയും ചെയ്യുന്നത് നല്ലതാണ്.
നിർജ്ജലീകരണവും (ഡീഹൈഡ്രേഷൻ) ശരീരവേദനയ്ക്ക് കാരണമാകാം. ശരീരത്തിൽ വെള്ളത്തിന്റെ അളവ് കുറയുമ്പോൾ പേശികളിൽ വലിവും സന്ധികളിൽ കാഠിന്യവും അനുഭവപ്പെടാം. അതിനാൽ ഉണർന്ന ഉടൻ ഒരു ഗ്ലാസ് വെള്ളം കുടിക്കുന്നത് ശരീരത്തിന്റെ പ്രവർത്തനം സജീവമാക്കാനും പേശിവേദന കുറയ്ക്കാനും സഹായിക്കും.
ഉദാസീനമായ പ്രഭാത ദിനചര്യയും പേശികളെയും സന്ധികളെയും ബാധിക്കും. രാവിലെ ചെറിയ സ്ട്രെച്ചിംഗ് വ്യായാമങ്ങൾ ചെയ്യുന്നത് രക്തചംക്രമണം മെച്ചപ്പെടുത്തുകയും ശരീരത്തിലെ കാഠിന്യം കുറയ്ക്കുകയും ചെയ്യും. ക്യാറ്റ്–കൗ, സീറ്റഡ് സ്പൈനൽ ട്വിസ്റ്റ്, സ്റ്റാൻഡിംഗ് ഫോർവേഡ് ഫോൾഡ് തുടങ്ങിയ ലളിതമായ വ്യായാമങ്ങൾ പ്രഭാതത്തിൽ ചെയ്യുന്നത് ശരീരത്തെ സജീവമാക്കാൻ സഹായിക്കും.
ഉറക്കക്കുറവും ഈ പ്രശ്നത്തിന് കാരണമാകുന്ന മറ്റൊരു ഘടകമാണ്. മതിയായ ഉറക്കം ലഭിക്കാത്തപ്പോൾ ശരീരത്തിൽ വീക്കം വർധിക്കുകയും വേദനയെ കൂടുതൽ അനുഭവപ്പെടാൻ ഇടയാക്കുകയും ചെയ്യും. അതിനാൽ സ്ഥിരമായ ഉറക്കക്രമം പാലിക്കുക, ഉറങ്ങുന്നതിനുമുമ്പ് മൊബൈൽ ഫോണുകളും മറ്റു സ്ക്രീനുകളും ഉപയോഗിക്കുന്നത് ഒഴിവാക്കുക തുടങ്ങിയ ശീലങ്ങൾ പിന്തുടരുന്നത് ഗുണകരമാണ്.
എന്നാൽ എല്ലാ സാഹചര്യങ്ങളിലും ഇത് സാധാരണ പ്രശ്നമാകണമെന്നില്ല. ചിലപ്പോൾ റൂമറ്റോയ്ഡ് ആർത്രൈറ്റിസ്, ഫൈബ്രോമയാൾജിയ, ഓസ്റ്റിയോ ആർത്രൈറ്റിസ്, സ്ലീപ് അപ്നിയ തുടങ്ങിയ ആരോഗ്യപ്രശ്നങ്ങളുടെ ലക്ഷണമായും ഇത് പ്രത്യക്ഷപ്പെടാം.
ഉണർന്നതിനുശേഷം ഒരു മണിക്കൂറിലധികം വേദന തുടർന്നുനിൽക്കുകയോ, വീക്കം, മരവിപ്പ്, ഇക്കിളി എന്നിവ ഉണ്ടാകുകയോ, ദിവസേന പ്രശ്നം കൂടിക്കൊണ്ടിരിക്കുകയോ ചെയ്യുന്നുവെങ്കിൽ ഡോക്ടറുടെ പരിശോധന നിർബന്ധമാണ്. ആരോഗ്യവുമായി ബന്ധപ്പെട്ട ഇത്തരം ലക്ഷണങ്ങളെ അവഗണിക്കാതെ സമയത്ത് ചികിത്സ തേടുന്നതാണ് ഏറ്റവും സുരക്ഷിതം.
