മലമ്പുഴയിൽ അധ്യാപകന്റെ ലൈംഗിക പീഡനം: കൂടുതൽ വിദ്യാർത്ഥികൾ
പാലക്കാട്: മലമ്പുഴയിൽ വിദ്യാർത്ഥിക്ക് മദ്യം നൽകി ലൈംഗികമായി പീഡിപ്പിച്ച കേസിൽ റിമാൻഡിൽ കഴിയുന്ന സംസ്കൃത അധ്യാപകൻ അനിലിനെതിരെ കൂടുതൽ പരാതികൾ പുറത്ത്. അധ്യാപകന്റെ പീഡനത്തിനിരയായത് നിരവധി വിദ്യാർത്ഥികളാണെന്ന് സ്ഥിരീകരിച്ചു. ചൈൽഡ് വെൽഫെയർ കമ്മിറ്റി (CWC) കൈമാറിയ അഞ്ച് വിദ്യാർത്ഥികളുടെ മൊഴികളുടെ അടിസ്ഥാനത്തിൽ മലമ്പുഴ പൊലീസ് പുതിയ കേസുകൾ രജിസ്റ്റർ ചെയ്തു.
സിഡബ്ല്യുസിയുടെ കൗൺസിലിംഗിനിടെയാണ് പീഡനത്തിനിരയായ വിദ്യാർത്ഥികൾ തങ്ങളുടെ ദുരനുഭവങ്ങൾ തുറന്നുപറഞ്ഞത്. ആദ്യഘട്ടത്തിൽ കൗൺസിലിംഗ് നൽകിയ അഞ്ച് വിദ്യാർത്ഥികളാണ് മൊഴി നൽകിയത്. യു.പി ക്ലാസുകളിൽ പഠിക്കുന്ന ആൺകുട്ടികളാണ് അധ്യാപകന്റെ ലൈംഗിക പീഡനത്തിനിരയായതെന്ന് പൊലീസ് അറിയിച്ചു.
കുട്ടികൾക്കും രക്ഷിതാക്കൾക്കുമായി സിഡബ്ല്യുസിയുടെ കൗൺസിലിംഗ് അടുത്ത ദിവസങ്ങളിലും തുടരുമെന്ന് അധികൃതർ അറിയിച്ചു. സംഭവവുമായി ബന്ധപ്പെട്ട് സ്കൂളിലെ പ്രധാനാധ്യാപികയ്ക്കും ക്ലാസ് ടീച്ചർക്കും വിദ്യാഭ്യാസ വകുപ്പ് നൽകിയ നോട്ടീസിന് മറുപടി നൽകേണ്ട അവസാന ദിവസമാണ് നാളെ.
