കരൂര് ദുരന്തം; വിജയ് നാളെ ഡല്ഹി സിബിഐ ഓഫിസില് ഹാജരാകും
ചെന്നൈ: കരൂര് ദുരന്തത്തില് തമിഴക വെട്രി കഴകം അധ്യക്ഷന് വിജയ് നാളെ ഡല്ഹി സിബിഐ ഓഫിസില് ഹാജരാകും. രാവിലെ 11 മണിക്ക് ഓഫീസിലെത്തുമെന്നാണ് വിവരം. നേരത്തെ ടിവികെ ഭാരവാഹികളായ ബുസി ആനന്ദ്, ആധവ് അര്ജുന, സി ടി ആര് നിര്മല്കുമാര്, മതിയഴകന് എന്നിവരെ സിബിഐ ചോദ്യം ചെയ്തിരുന്നു. ഇന്നലെ ആഭ്യന്തര മന്ത്രാലയത്തില് നിന്നുള്ള സംഘം വിജയ്യുടെ കാരവാനിലടക്കം ഫോറന്സിക് പരിശോധന നടത്തിയിരുന്നു. അതേസമയം, വിജയ്ക്ക് കര്ശന സുരക്ഷാ ക്രമീകരണങ്ങള് ഒരുക്കിയതായി ഡല്ഹി പോലിസ് അറിയിച്ചു.
കരൂര് കേസില് ആദ്യമായാണ് വിജയ്യുടെ മൊഴി രേഖപ്പെടുത്തുന്നത്. നാളെ ഡല്ഹി ഓഫിസില് ഹാജരാകണമെന്നാവശ്യപ്പെട്ട് വിജയ്ക്ക് സിബിഐ സമന്സ് അയച്ചിരുന്നു. നാളെ രാവിലെ പ്രത്യേക വിമാനത്തില് വിജയ് ചെന്നൈയില് നിന്നും ഡല്ഹിയിലേക്ക് തിരിക്കും. രണ്ടു ദിവസം വിജയ് ഡല്ഹിയില് തുടരുമെന്ന് ടിവികെ വൃത്തങ്ങള് അറിയിച്ചു. 13ന് വൈകിട്ടാകും വിജയ് ചെന്നൈയിലേക്ക് തിരിക്കുക. വിമാനത്താവളം, ഹോട്ടല്, സിബിഐ ഓഫീസ് എന്നിവിടങ്ങളിലും വിജയ് യാത്രചെയ്യുന്ന റോഡിലും സുരക്ഷയൊരുക്കുമെന്നും പോലിസ് അറിയിച്ചു.
