ഒറ്റപ്പാലത്ത് പുലർച്ചെ ലോറിയുമായി കൂട്ടിയിടിച്ച് സിവിൽ ഡിഫൻസ് ഡെപ്യൂട്ടി പോസ്റ്റ് വാർഡന് ദാരുണാന്ത്യം
പാലക്കാട്: പുലർച്ചെയുണ്ടായ വാഹനാപകടത്തിൽ സിവിൽ ഡിഫൻസ് ഡെപ്യൂട്ടി പോസ്റ്റ് വാർഡൻ മരിച്ചു. പാലക്കാട് പറക്കുന്നം സ്വദേശി സനൂപ് കെ. ആണ് ദാരുണമായി മരിച്ചത്. ഇന്ന് പുലർച്ചെ അഞ്ചുമണിയോടെ ഒറ്റപ്പാലം ഭാഗത്താണ് അപകടമുണ്ടായത്. സനൂപ് സഞ്ചരിച്ച വാഹനവും ലോറിയും തമ്മിൽ കൂട്ടിയിടിക്കുകയായിരുന്നു.
അപകടത്തിൽ ഗുരുതരമായി പരിക്കേറ്റ സനൂപിനെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. സിവിൽ ഡിഫൻസിന്റെ ഭാഗമായി രക്ഷാപ്രവർത്തനങ്ങളിലും സാമൂഹിക സേവനങ്ങളിലും സജീവമായിരുന്ന സനൂപിന്റെ അപ്രതീക്ഷിത വിയോഗം സഹപ്രവർത്തകരെയും നാട്ടുകാരെയും ദുഃഖത്തിലാഴ്ത്തി.
സനൂപിന്റെ വേർപാടിൽ എസ്ഡിപിഐ പാലക്കാട് ജില്ലാ ജനറൽ സെക്രട്ടറി റഷീദ് പുതുനഗരം അനുശോചനം രേഖപ്പെടുത്തി. സനൂപിന്റെ കുടുംബത്തിന്റെയും ബന്ധുക്കളുടെയും നാട്ടുകാരുടെയും സഹപ്രവർത്തകരുടെയും ദുഃഖത്തിൽ പങ്കുചേരുന്നതായും പരേതന്റെ ആത്മാവിനായി പ്രാർത്ഥിക്കുന്നതായും അദ്ദേഹം പറഞ്ഞു.
