മലബാർ സിമൻ്റ്സ് മുൻ കമ്പനി സെക്രട്ടറി വി. ശശീന്ദ്രന്റെയും മക്കളുടെയും ദുരൂഹമരണത്തിന് 16 വർഷം; ജനുവരി 24-ന് അനുസ്മരണയോഗം
പാലക്കാട്: കൊല്ലങ്കോട് മലബാർ സിമൻ്റ്സ് മുൻ കമ്പനി സെക്രട്ടറിയായിരുന്ന നെന്മേനി സ്വദേശിയായ വി. ശശീന്ദ്രന്റെയും അദ്ദേഹത്തിന്റെ രണ്ടു മക്കളുടെയും ദുരൂഹ സാഹചര്യങ്ങളിലുണ്ടായ വിയോഗത്തിന് 16 വർഷം തികയുന്നു. ഈ പശ്ചാത്തലത്തിൽ പതിനാറാം ചരമവാർഷിക ദിനമായ ജനുവരി 24-ന് ആക്ഷൻ കൗൺസിലിന്റെ നേതൃത്വത്തിൽ കൊല്ലങ്കോട്ടു അനുസ്മരണയോഗം സംഘടിപ്പിക്കുമെന്ന് സംഘാടകർ അറിയിച്ചു.
വൈകീട്ട് മൂന്ന് മണിക്ക് നെന്മേനി വിരുത്തിയിലെ കൈവല്യധാമത്തിൽ നടക്കുന്ന അനുസ്മരണ പരിപാടിയിൽ കോൺഗ്രസ് നേതാവ് വി.എം. സുധീരൻ, പരിസ്ഥിതി പ്രവർത്തകനും സാമൂഹിക ചിന്തകനുമായ പ്രൊഫ. സി.ആർ. നീലകണ്ഠൻ തുടങ്ങിയ പ്രമുഖർ പങ്കെടുക്കും.
2009-ലാണ് മലബാർ സിമൻ്റ്സ് മുൻ കമ്പനി സെക്രട്ടറി വി. ശശീന്ദ്രനും അദ്ദേഹത്തിന്റെ രണ്ടു മക്കളും ദുരൂഹ സാഹചര്യത്തിൽ മരണപ്പെട്ടത്. കേസിൽ സുതാര്യവും സമഗ്രവുമായ അന്വേഷണം ആവശ്യപ്പെട്ട് ആക്ഷൻ കൗൺസിൽ രൂപീകരിക്കപ്പെടുകയും വർഷങ്ങളായി നീതി തേടി വിവിധ സമരങ്ങളും അനുസ്മരണ പരിപാടികളും സംഘടിപ്പിച്ചുവരികയും ചെയ്യുകയാണ്.
ശശീന്ദ്രന്റെയും മക്കളുടെയും മരണത്തിൽ ഇന്നും അനേകം സംശയങ്ങൾ അവശേഷിക്കുന്നുവെന്നും, സത്യം പുറത്തുകൊണ്ടുവരാനും കുറ്റക്കാരെ നിയമത്തിന് മുന്നിൽ കൊണ്ടുവരാനും അധികാരികൾ തയ്യാറാകണമെന്നും ആക്ഷൻ കൗൺസിൽ നേതാക്കൾ ആവശ്യപ്പെട്ടു. അനുസ്മരണ യോഗം നീതിക്കായുള്ള പോരാട്ടം പുതുക്കിപ്പരിശോധിക്കാനുള്ള വേദിയാകുമെന്നും അവർ പറഞ്ഞു.
