കൂവണമെങ്കിൽ ടീമിനെ മുഴുവനായി കൂവണം; ഒരാളെ മാത്രം കുറ്റപ്പെടുത്തരുത്’ – എംബാപ്പെ
മാഡ്രിഡ്: റയൽ മാഡ്രിഡിന്റെ മോശം പ്രകടനത്തെ തുടർന്നുള്ള ആരാധകരുടെ പ്രതിഷേധത്തെക്കുറിച്ച് ഫ്രഞ്ച് സൂപ്പർ താരം കിലിയൻ എംബാപ്പെ പ്രതികരിച്ചു. ആരാധകർ കൂവുന്നത് സ്വാഭാവികമാണെന്ന് സമ്മതിച്ച എംബാപ്പെ, എന്നാൽ ഒരു കളിക്കാരനെ മാത്രം ലക്ഷ്യംവെച്ച് കുറ്റപ്പെടുത്തുന്നത് ശരിയല്ലെന്ന് വ്യക്തമാക്കി.
‘ഞങ്ങൾ ശരിയായ രീതിയിൽ കളിക്കാത്തപ്പോൾ ആരാധകർ നിരാശപ്പെടുന്നത് എനിക്ക് മനസ്സിലാക്കാം. കൂവണമെങ്കിൽ അത് ടീമിനെ മുഴുവനായി വേണം. ഒരാളെ മാത്രം കുറ്റപ്പെടുത്തുന്നത് നീതിയല്ല. ഒരു ടീം എന്ന നിലയിലാണ് ഞങ്ങളുടെ പ്രകടനം മോശമാകുന്നത്,’ എംബാപ്പെ പറഞ്ഞു.
സഹതാരം വിനീഷ്യസ് ജൂനിയറിനെ ശക്തമായി പിന്തുണച്ച എംബാപ്പെ, നിലവിലെ തിരിച്ചടികൾക്ക് കാരണം ബ്രസീലിയൻ താരമല്ലെന്നും വ്യക്തമാക്കി. വിനീഷ്യസ് ഒരു അത്ഭുതകരമായ കളിക്കാരനാണെന്നും, തനിക്ക് അദ്ദേഹം വളരെ പ്രാധാന്യമുള്ള ആളാണെന്നും എംബാപ്പെ പറഞ്ഞു. റയൽ മാഡ്രിഡിൽ വിനീഷ്യസ് ഒറ്റയ്ക്കല്ലെന്നും, മുഴുവൻ ടീമും അദ്ദേഹത്തിനൊപ്പം ഉണ്ടെന്നും താരം കൂട്ടിച്ചേർത്തു.
സൂപ്പർ കപ്പിലെ തോൽവിക്ക് പിന്നാലെ പുറത്താക്കപ്പെട്ട മുൻ പരിശീലകൻ സാബി അലോൺസോയെയും എംബാപ്പെ പ്രതിരോധിച്ചു. അലോൺസോയുമായി തനിക്ക് യാതൊരു പ്രശ്നവുമില്ലായിരുന്നുവെന്നും, അദ്ദേഹം മികച്ച പരിശീലകനാണെന്നും എംബാപ്പെ വ്യക്തമാക്കി. അലോൺസോ പരാജയപ്പെട്ടുവെന്ന് പറയുന്നത് ശരിയല്ലെന്നും, അദ്ദേഹവുമായി തനിക്ക് മികച്ച ബന്ധമായിരുന്നുവെന്നും താരം പറഞ്ഞു.
