ഒരു നുള്ള് ഈ ചേരുവ ചേര്‍ത്താല്‍ മതി; തട്ടുകട സ്റ്റൈല്‍ മുട്ട ബജി റെഡി
മലയാളികൾക്ക് ഏറെ ഇഷ്ടമുള്ള ലഘുഭക്ഷണങ്ങളിലൊന്നാണ് മുട്ട ബജി. നല്ല മൊരിഞ്ഞ മുട്ട ബജിയും ചൂട് ചായയും കൂടിയാൽ രുചി ഇരട്ടിയാകും. കടലമാവിന്റെ ക്രിസ്പിയായ കോട്ടിങും ഉള്ളിൽ നന്നായി വെന്ത മുട്ടയും ചേർന്നപ്പോൾ കിട്ടുന്ന രുചി തട്ടുകടകളിലെത് പോലെ തന്നെ. ഇനി തട്ടുകടയിലേക്കു പോകേണ്ടതില്ല; വീട്ടിൽ ലഭ്യമായ കുറച്ച് ചേരുവകൾ കൊണ്ട് അതേ രുചിയിൽ മുട്ട ബജി പത്ത് മിനിറ്റിൽ തയ്യാറാക്കാം.
ചേരുവകൾ
മുട്ട – 4 എണ്ണം (പുഴുങ്ങിയത്)
കടലമാവ് – 1 കപ്പ്
അരിപ്പൊടി – 2 ടേബിള്‍സ്പൂണ്‍ (കൂടുതല്‍ മൊരിഞ്ഞു കിട്ടാന്‍)
കായപ്പൊടി – 1/4 ടീസ്പൂണ്‍
മുളകുപൊടി – 1 ടീസ്പൂണ്‍ (എരിവിന് അനുസരിച്ച്)
മഞ്ഞള്‍പ്പൊടി – 1/4 ടീസ്പൂണ്‍
ഇഞ്ചി-വെളുത്തുള്ളി പേസ്റ്റ് – 1/2 ടീസ്പൂണ്‍
ഉപ്പ് – പാകത്തിന്
വെളിച്ചെണ്ണ – വറുക്കാന്‍ ആവശ്യത്തിന്
തയ്യാറാക്കുന്ന വിധം
പുഴുങ്ങിയ മുട്ടകള്‍ തൊലി കളഞ്ഞ് നീളത്തില്‍ രണ്ടായി മുറിച്ച് വയ്ക്കുക. ഒരു പാത്രത്തില്‍ കടലമാവ്, അരിപ്പൊടി, മുളകുപൊടി, മഞ്ഞള്‍പ്പൊടി, കായപ്പൊടി, ഇഞ്ചി-വെളുത്തുള്ളി പേസ്റ്റ്, ഉപ്പ് എന്നിവ ചേര്‍ത്ത് നന്നായി കലക്കുക. ഇതിലേക്ക് കുറേശ്ശെ വെള്ളം ചേര്‍ത്ത് കട്ടിയുള്ള മാവാക്കി മാറ്റണം. മാവ് അധികം ലൂസാവരുത്; മുട്ടയില്‍ നന്നായി പൊതിയാന്‍ പാകത്തിന് കട്ടിയുണ്ടാകണം.
തയ്യാറാക്കിയ മാവില്‍ ഓരോ മുട്ട കഷ്ണവും നന്നായി മുക്കി എടുക്കുക. പ്രത്യേകിച്ച് മുറിച്ച ഭാഗത്ത് മാവ് നന്നായി പിടിച്ചിട്ടുണ്ടെന്ന് ഉറപ്പാക്കണം.
ചീനച്ചട്ടിയില്‍ വെളിച്ചെണ്ണ ഒഴിച്ച് ചൂടാകുമ്പോള്‍ മാവില്‍ മുക്കിയ മുട്ടകള്‍ ഓരോന്നായി ഇട്ട് ഇടത്തരത്തിലുള്ള തീയില്‍ വറുക്കുക. ഒരു വശം പാകമായാല്‍ മറിച്ച് എല്ലാ വശവും ഗോള്‍ഡന്‍ ബ്രൗണ്‍ നിറമാകുന്നതുവരെ വറുത്തെടുക്കുക.
ചെറിയ ടിപ്പ്
മുട്ട മുറിച്ച ശേഷം മഞ്ഞക്കരുവിന് മുകളില്‍ അല്പം മുളകുപൊടിയും ഉപ്പും വിതറിയാല്‍ തട്ടുകടകളില്‍ കിട്ടുന്ന അതേ രുചി ലഭിക്കും. ബജി കൂടുതല്‍ പൊങ്ങിവരാന്‍ വേണമെങ്കില്‍ മാവില്‍ ഒരു നുള്ള് അപ്പക്കാരം (ബേക്കിംഗ് സോഡ) ചേര്‍ക്കാം.
