പാചകവാതക വിലവർദ്ധനവ്: വിമൻ ഇന്ത്യ മൂവ്മെന്റ് പട്ടാമ്പിയിൽ ധർണ്ണ നടത്തി
പട്ടാമ്പി: രാജ്യത്ത്‌ പാചകവാതക വില അടിക്കടി വർദ്ധിക്കുന്നതിനെതിരെയും ജനജീവിതം ദുസ്സഹമാക്കുന്ന കേന്ദ്ര സർക്കാർ നയങ്ങൾക്കെതിരെയും ശക്തമായ പ്രതിഷേധവുമായി വിമൻ ഇന്ത്യ മൂവ്മെന്റ്. അടുക്കളകൾക്ക് ആഘാതമായി ഗ്യാസ് വില ഉയരുന്നു എന്ന മുദ്രാവാക്യമുയർത്തി വിമൻ ഇന്ത്യ മൂവ്മെന്റ് പട്ടാമ്പി, ഷോർണൂർ മണ്ഡലം കമ്മിറ്റികളുടെ നേതൃത്വത്തിൽ മേലെ പട്ടാമ്പിയിൽ പ്രതിഷേധ ധർണ്ണ സംഘടിപ്പിച്ചു.
പ്രതിഷേധ ധർണ്ണ വിമൻ ഇന്ത്യ മൂവ്മെന്റ് സംസ്ഥാന വൈസ് പ്രസിഡന്റ് ബാബിയ ടീച്ചർ ഉദ്ഘാടനം ചെയ്തു. സാധാരണക്കാരായ ജനങ്ങളുടെ കുടുംബ ബജറ്റ് തകർക്കുന്ന രീതിയിലാണ് നിലവിൽ പാചകവാതക വില വർദ്ധിച്ചുകൊണ്ടിരിക്കുന്നതെന്നും, സ്ത്രീകളെ ഏറ്റവും കൂടുതൽ ബാധിക്കുന്ന ഈ വിഷയത്തിൽ അധികാരികൾ അടിയന്തരമായി ഇടപെടണമെന്നും അവർ ആവശ്യപ്പെട്ടു.
മേലെ പട്ടാമ്പിയിൽ നടന്ന ധർണ്ണയ്ക്ക് വിമൻ ഇന്ത്യ മൂവ്മെന്റ് പട്ടാമ്പി മണ്ഡലം പ്രസിഡന്റ് ഹഫ്സ സുലൈമാൻ, സെക്രട്ടറി ആസിയ മാനു, ഷൊർണൂർ മണ്ഡലം പ്രസിഡന്റ് ഷാക്കിറ, സെക്രട്ടറി സൈനബ എന്നിവർ നേതൃത്വം നൽകി. വിലക്കയറ്റത്തിനെതിരെ പ്ലക്കാർഡുകളും ബാനറുകളും ഏന്തി വനിതകൾ പ്രതിഷേധത്തിൽ പങ്കെടുത്തു.
