ട്രെയിനിൽ നടത്തിയ പരിശോധനയിൽ 50 കിലോയിൽ അധികം കഞ്ചാവ് പിടികൂടി
പാലക്കാട്: പാലക്കാട് എക്സൈസ് സ്ക്വാഡ് ട്രെയിനിൽ നടത്തിയ പരിശോധനയിൽ 50.440 കിലോഗ്രാം കഞ്ചാവ് പിടികൂടി. പൂന-കന്യാകുമാരി എക്സ്പ്രസിന്റെ ജനറൽ കമ്പാർട്ട്മെന്റ് പരിശോധിക്കുന്നതിനിടെയാണ് സംശയാസ്പദമായ ചാക്കുകൾ കണ്ടെത്തിയത്. ഇവയുടെ ഉടമസ്ഥൻ ആരാണെന്ന് ഇതുവരെ സ്ഥിരീകരിക്കാനായിട്ടില്ല.
സംഭവം ശ്രദ്ധയിൽപ്പെട്ടതോടെ എക്സൈസ് സംഘം ചാക്കുകൾ കസ്റ്റഡിയിലെടുത്തു. കഞ്ചാവ് എവിടെ നിന്നാണ് എത്തിയത്, ആരാണ് കയറ്റിയത്, ആരെയാണ് ലക്ഷ്യമിട്ടതെന്ന് വ്യക്തമാക്കുന്നതിനായി അന്വേഷണം ശക്തമാക്കിയിട്ടുണ്ട്. ട്രെയിൻ വഴിയുള്ള മയക്കുമരുന്ന് ഗതാഗതത്തിന് പിന്നിൽ പ്രവർത്തിക്കുന്ന സംഘങ്ങളെയെല്ലാം കണ്ടെത്താനാണ് ശ്രമമെന്നും അധികൃതർ അറിയിച്ചു.
പരിശോധനയും പിടികൂടലും ഹരിക്കുട്ടൻ, അജിത്, അജിത, അരുൺ, സുരേഷ് ആർ. എസ് എന്നിവരുടെ നേതൃത്വത്തിലായിരുന്നു. കൂടാതെ പാലക്കാട് ആർപിഎഫ് സി.ഐ.ബി വിഭാഗത്തിലെ കെ. എം. ഷിജു, കെ. വി., സജി അഗസ്റ്റിൻ, എം. സതീഷ് കുമാർ, കെ. സതീഷ് കുമാർ എന്നിവർ ചേർന്നും സംയുക്ത പരിശോധന നടത്തി.
ബാഗേജിന്റെ യഥാർത്ഥ ഉടമസ്ഥനെ തിരിച്ചറിയുന്നതിനും സിസിടിവി ദൃശ്യങ്ങൾ പരിശോധിക്കുന്നതിനുമായി റെയിൽവേ പൊലീസ്, എക്സൈസ് വിഭാഗം എന്നിവർ ചേർന്ന് തുടർന്വേഷണം ആരംഭിച്ചിട്ടുണ്ട്. മയക്കുമരുന്ന് വരവിരുത്തലിനെതിരെ കർശന നടപടികൾ തുടരുമെന്നും അധികൃതർ വ്യക്തമാക്കി.
