UAPA: അഞ്ച് വർഷം 10,440 അറസ്റ്റ്; ശിക്ഷാനിരക്ക് മൂന്ന് ശതമാനത്തിലും താഴെ – ലോക്സഭ രേഖ
ന്യൂഡൽഹി:
അൺലോഫുൾ ആക്ടിവിറ്റീസ് (പ്രിവൻഷൻ) ആക്ട് – UAPA – പ്രകാരം രാജ്യത്ത് അറസ്റ്റുകളുടെ എണ്ണം കുത്തനെ ഉയരുന്നുണ്ടെങ്കിലും ശിക്ഷാനിരക്ക് അതീവ കുറഞ്ഞതാണെന്ന് ലോക്സഭയിൽ സമർപ്പിച്ച ഔദ്യോഗിക കണക്കുകൾ വ്യക്തമാക്കുന്നു.
2025 ഡിസംബർ 2-ന് ലോക്സഭയിൽ ഉന്നയിച്ച അൺസ്റ്റാർഡ് ചോദ്യം നമ്പർ 351 ന് കേന്ദ്ര സർക്കാർ നൽകിയ എഴുത്തുപരമായ മറുപടിയിൽ ഉൾപ്പെടുത്തിയ Annexure പ്രകാരം, 2019 മുതൽ 2023 വരെയുള്ള അഞ്ചുവർഷ കാലയളവിൽ ഇന്ത്യയിലുടനീളം 10,440 പേരെയാണ് UAPA നിയമപ്രകാരം അറസ്റ്റ് ചെയ്തിരിക്കുന്നത്.
അതേസമയം, ഇതേ കാലയളവിൽ ശിക്ഷിക്കപ്പെട്ടവരുടെ എണ്ണം 335 മാത്രമാണെന്നും രേഖ വ്യക്തമാക്കുന്നു. ഇതനുസരിച്ച്, അറസ്റ്റുചെയ്യപ്പെട്ടവരിൽ മൂന്ന് ശതമാനത്തിൽ താഴെപ്പേർ മാത്രമാണ് ഇതുവരെ ശിക്ഷിക്കപ്പെട്ടിട്ടുള്ളത്.
വർഷംവാരിയായ കണക്കുകൾ
Annexure-ൽ ഉൾപ്പെടുത്തിയ ആൾ ഇന്ത്യ കണക്കുകൾ പ്രകാരം:
2019: 1,948 പേർ അറസ്റ്റ് – 34 പേർ ശിക്ഷിക്കപ്പെട്ടു
2020: 1,321 പേർ അറസ്റ്റ് – 80 പേർ ശിക്ഷിക്കപ്പെട്ടു
2021: 1,621 പേർ അറസ്റ്റ് – 62 പേർ ശിക്ഷിക്കപ്പെട്ടു
2022: 2,636 പേർ അറസ്റ്റ് – 41 പേർ ശിക്ഷിക്കപ്പെട്ടു
2023: 2,914 പേർ അറസ്റ്റ് – 118 പേർ ശിക്ഷിക്കപ്പെട്ടു
ദീർഘകാല തടങ്കൽ
കണക്കുകൾ സൂചിപ്പിക്കുന്നത്, UAPA കേസുകളിൽ വലിയൊരു വിഭാഗം പ്രതികളും അന്വേഷണം പൂർത്തിയാകാതെയോ വിചാരണ അന്തിമവിധിയിലെത്താതെയോ ദീർഘകാലം ജയിലിൽ കഴിയേണ്ടിവരുന്ന സാഹചര്യമാണുള്ളത് എന്നതാണ്. ശിക്ഷാനിരക്ക് കുറഞ്ഞതും കേസുകൾ നീണ്ടുനിൽക്കുന്നതും നിയമത്തിന്റെ പ്രയോഗത്തെക്കുറിച്ച് ഗൗരവമായ ചോദ്യങ്ങൾ ഉയർത്തുന്നുവെന്നാണ് നിയമവിദഗ്ധരുടെ വിലയിരുത്തൽ.
നിയമപ്രയോഗത്തെച്ചൊല്ലി വിമർശനം
‘ഭീകരപ്രവർത്തനം’, ‘നിയമവിരുദ്ധ പ്രവർത്തനം’ എന്നീ പദങ്ങൾക്ക് വ്യാപകവും വ്യക്തതയില്ലാത്തതുമായ നിർവചനങ്ങൾ നൽകിയിരിക്കുന്നതുകൊണ്ട് നിയമം ദുരുപയോഗം ചെയ്യപ്പെടാൻ സാധ്യതയുണ്ടെന്ന വിമർശനം മനുഷ്യാവകാശ സംഘടനകൾ മുൻപേ ഉന്നയിച്ചിട്ടുണ്ട്.
കൂടാതെ, നിരപരാധിത്വം തെളിയിക്കേണ്ട ബാധ്യത പ്രതികളുടെ മേൽ ചുമത്തുന്ന വ്യവസ്ഥ UAPAയുടെ ഏറ്റവും കർശനമായ വശങ്ങളിലൊന്നാണെന്ന വിമർശനവും ഉയരുന്നുണ്ട്.
രാഷ്ട്രീയ പ്രതികരണം
ഇത്രയും ഗൗരവമേറിയ കണക്കുകൾ പുറത്തുവന്നിട്ടും, വിഷയത്തെ ശക്തമായ പൊതുചർച്ചയിലേക്കോ വ്യാപക പ്രതിഷേധങ്ങളിലേക്കോ ഉയർത്തുന്നതിൽ മുഖ്യധാരാ രാഷ്ട്രീയ പാർട്ടികൾ പര്യാപ്തമായി ഇടപെടുന്നില്ലെന്ന വിമർശനവും ഉയരുകയാണ്.
