പരാതിക്കും ആർ.ടി.ഐ അപേക്ഷയ്ക്കും പിന്നാലെ നടപടി; പിരിയാരീ പഞ്ചായത്തിൽ റോഡ് പണി തുടങ്ങി
പാലക്കാട്: പിരിയാരീ പഞ്ചായത്തിലെ
5 – 4 വാർഡ് (വടക്കേ പറമ്പ് – കുറിച്ചിമലക്കുന്ന് റോഡ്)
ഏറെ നാളായി തകർന്ന നിലയിൽ കിടന്നിരുന്ന റോഡിന്റെ നിർമ്മാണ പ്രവർത്തനങ്ങൾ ഒടുവിൽ ആരംഭിച്ചു. റോഡിന്റെ ദുരവസ്ഥയെക്കുറിച്ച് കെ. കാജാ ഹുസൈൻ നൽകിയ പരാതിയും വിവരാവകാശ നിയമപ്രകാരം (ആർ.ടി.ഐ) നൽകിയ അപേക്ഷയും അടിസ്ഥാനമാക്കി ബന്ധപ്പെട്ട അധികൃതർ നടപടി സ്വീകരിച്ചതോടെയാണ് റോഡ് പണി ആരംഭിച്ചത്.
ദീർഘകാലമായി അറ്റകുറ്റപ്പണികൾ പോലും നടത്താതിരുന്നതിനെ തുടർന്ന് റോഡ് ഗതാഗതയോഗ്യമല്ലാത്ത നിലയിലായിരുന്നു. കല്ലും മണ്ണും നിറഞ്ഞ റോഡിലൂടെ വാഹനങ്ങൾ സഞ്ചരിക്കുന്നത് ഏറെ ബുദ്ധിമുട്ടായി മാറിയിരുന്നു. സ്കൂൾ വിദ്യാർത്ഥികൾക്കും പ്രദേശവാസികൾക്കും ദിവസേന യാത്ര ചെയ്യുന്നതിൽ വലിയ പ്രയാസങ്ങളാണ് നേരിടേണ്ടി വന്നത്.
ഇത് സംബന്ധിച്ച് പലതവണ അധികൃതരുടെ ശ്രദ്ധയിൽപ്പെടുത്തിയിട്ടും കാര്യമായ നടപടി ഉണ്ടായിരുന്നില്ല. തുടർന്ന് കെ. കാജാ ഹുസൈൻ ബന്ധപ്പെട്ട വകുപ്പുകൾക്ക് പരാതി നൽകുകയും വിവരാവകാശ നിയമപ്രകാരം റോഡിന്റെ നിർമ്മാണവുമായി ബന്ധപ്പെട്ട വിവരങ്ങൾ ആവശ്യപ്പെടുകയും ചെയ്തു.
ഇതിന് പിന്നാലെയാണ് പഞ്ചായത്തും ബന്ധപ്പെട്ട വകുപ്പും വിഷയത്തിൽ ഇടപെട്ട് റോഡ് നിർമ്മാണ പ്രവർത്തനങ്ങൾ ആരംഭിച്ചത്. നിലവിൽ റോഡിന്റെ നവീകരണത്തിനായുള്ള പ്രാഥമിക പ്രവർത്തനങ്ങളാണ് പുരോഗമിക്കുന്നത്.
നിർമാണ പ്രവർത്തനങ്ങൾ വേഗത്തിൽ പൂർത്തിയാക്കി റോഡ് പൂർണ്ണമായും ഗതാഗതയോഗ്യമാക്കണമെന്നാണ് പ്രദേശവാസികളുടെ ആവശ്യം. റോഡ് പണി ആരംഭിച്ചതോടെ നാട്ടുകാരിൽ ആശ്വാസം ഉണ്ടായി.
