പൂരം മുമ്പ് ദുരന്തം: തിരുവമ്പാടി വെടിക്കെട്ട് പുരയില് പൊട്ടിത്തെറി, മൂന്ന് മരണം
തൃശ്ശൂര്: തൃശ്ശൂര് പൂരത്തിന് കൊടിയേറിയതിന് പിന്നാലെ പൂരപ്രേമികളെ നടുക്കിയ വന് ദുരന്തം. മുണ്ടത്തിക്കോടുള്ള തിരുവമ്പാടി വിഭാഗത്തിന്റെ വെടിക്കെട്ട് നിര്മ്മാണ കേന്ദ്രത്തില് ഉണ്ടായ ശക്തമായ സ്ഫോടനത്തില് മൂന്ന് പേര് മരിച്ചു. നിരവധി പേര്ക്ക് പരിക്കേറ്റിട്ടുണ്ട്.
വൈകുന്നേരം നടന്ന അപകടത്തില് പൂരത്തിനായുള്ള വെടിക്കെട്ട് സാമഗ്രികള് തയ്യാറാക്കുന്നതിനിടെയായിരുന്നു പൊട്ടിത്തെറി ഉണ്ടായത്. ഏകദേശം 40-ഓളം തൊഴിലാളികള്ക്ക് പൊള്ളലേറ്റതായാണ് പ്രാഥമിക വിവരം. ഇവരില് ചിലരുടെ നില ഗുരുതരമാണെന്നാണ് റിപ്പോര്ട്ട്. മരിച്ചവരുടെ മൃതദേഹങ്ങള് കണ്ടെത്തി.
തിരുവമ്പാടി വിഭാഗത്തിന്റെ സാമ്പിള് വെടിക്കെട്ട് പുരയിലാണ് ആദ്യം സ്ഫോടനം ഉണ്ടായത്. കിലോമീറ്ററുകള് അകലെയേയ്ക്കും പ്രകമ്പനം അനുഭവപ്പെട്ട ശക്തമായ പൊട്ടിത്തെറിയില് സമീപ പ്രദേശങ്ങളിലെ വീടുകള്ക്ക് കുലുക്കമുണ്ടാകുകയും നാശനഷ്ടങ്ങള് സംഭവിക്കുകയും ചെയ്തു. ആദ്യ സ്ഫോടനത്തിന് പിന്നാലെ രക്ഷാപ്രവര്ത്തനം പുരോഗമിക്കുന്നതിനിടെ വീണ്ടും സ്ഫോടനം ഉണ്ടായത് സ്ഥലത്തെ ആശങ്ക വര്ധിപ്പിച്ചു.
പോലീസും ഫയര്ഫോഴ്സും നാട്ടുകാരും ചേര്ന്ന് രക്ഷാപ്രവര്ത്തനം ശക്തമാക്കി. പരിക്കേറ്റവരെ തത്സമയം സമീപ ആശുപത്രികളിലേക്കും മെഡിക്കല് കോളേജിലേക്കും മാറ്റി. പരിക്കേറ്റവരുടെ എണ്ണം കൂടി വരാനിടയുള്ളതിനാല് ജില്ലയിലെ പ്രധാന ആശുപത്രികള്ക്ക് ജില്ലാ ഭരണകൂടം ജാഗ്രതാ നിര്ദ്ദേശം നല്കി.
ഏപ്രില് 26-ന് നടക്കാനിരിക്കുന്ന തൃശ്ശൂര് പൂരത്തിന്റെ മുന്നോടിയായാണ് വെടിക്കെട്ട് ജോലികള് പുരോഗമിച്ചുകൊണ്ടിരുന്നത്. സ്ഫോടനത്തിന്റെ ശബ്ദം നഗരത്തിന്റെ വിവിധ ഭാഗങ്ങളില് കേട്ടതായി നാട്ടുകാര് പറഞ്ഞു. വെടിക്കെട്ട് സാമഗ്രികള് സൂക്ഷിച്ചിരുന്ന പുര പൂര്ണമായും തകര്ന്നിരിക്കുകയാണ്.
അപകടത്തെ തുടര്ന്ന് പൂരത്തിന്റെ വെടിക്കെട്ട് നടത്തിപ്പിനെ കുറിച്ച് ആശങ്ക ഉയര്ന്നിട്ടുണ്ട്. സ്ഫോടനത്തിന്റെ കാരണം വ്യക്തമല്ലെന്നും വിശദമായ അന്വേഷണം ആരംഭിച്ചതായും പോലീസ് അറിയിച്ചു. പൂരം നടക്കാന് ദിവസങ്ങള് മാത്രം ബാക്കി നില്ക്കെ ഉണ്ടായ ഈ ദുരന്തം തൃശ്ശൂരിനെ വന് നടുക്കത്തിലാഴ്ത്തിയിരിക്കുകയാണ്.
