പ്രവേശനോത്സവത്തിനിടെ മിഠായി ഡസ്കിലിട്ട് കൊടുത്ത് വി.മുരളീധരൻ എംഎൽഎ, സമൂഹ മാധ്യമങ്ങളിൽ വിമർശനം
തിരുവനന്തപുരം: പ്രവേശനോത്സവത്തിനിടെ തിരുവനന്തപുരം കട്ടേല ട്രൈബൽ റസിഡൻഷ്യൽ സ്കൂളിൽ വി.മുരളീധരൻ എംഎൽഎ മിഠായി വിതരണം ചെയ്ത രീതിക്കെതിരെ സാമൂഹ മാധ്യമങ്ങളിൽ വിമർശനം ശക്തമാകുന്നു. മിഠായി കുട്ടികളുടെ കയ്യിൽ നൽകാതെ മേശപ്പുറത്ത് ഇട്ടുകൊടുക്കുകയായിരുന്നു. പട്ടികജാതി – പട്ടികവർഗ വികസന വകുപ്പ് മന്ത്രി കെ.എ തുളസിയുടെ സാന്നിധ്യത്തിലായിരുന്നു സംഭവം. സംഭവത്തിൽ വിമർശനവുമായി മുൻമന്ത്രി വി.ശിവൻകുട്ടിയും രംഗത്തെത്തി. മുരളീധരന്റേത് തരംതാണതും വിവേചനപരമായതുമായ നടപടിയാണെന്നും വിദ്യാർഥികളെ അധിക്ഷേപിക്കുകയാണെന്നും വി.ശിവൻകുട്ടി പ്രതികരിച്ചു. മുരളീധരനെ തടയാനോ തിരുത്താനോ മന്ത്രി കെ.എ തുളസി തയാറാകത്തതിനെയും ശിവൻകുട്ടി വിമർശിച്ചു. നിശബ്ദമായി നോക്കി നിന്നത് ഗുരുതര വീഴ്ചയാണെന്നും ശിവൻകുട്ടി കുറ്റപ്പെടുത്തി. കഴിഞ്ഞ ദിവസമാണ് മിഠായി വിതരണത്തിന്റെ വീഡിയോ പുറത്തുവന്നത്. മന്ത്രി കെ.എ തുളസിയെയും വിഡീയോയിൽ കാണാം. മിഠായി ആ കുഞ്ഞുങ്ങളുടെ കൈയിൽ കൊടുത്താൽ എന്തായിരുന്നു പ്രശ്നം എന്നുതുടങ്ങി നിരവധി കമന്റുകളാണ് സമൂഹ മാധ്യമങ്ങളിൽ വരുന്നത്.
