ധർമേന്ദ്ര പ്രധാൻ രാജി ആവശ്യപ്പെട്ട് പ്രതിഷേധം ശക്തം; പാർലമെന്റിലും വിഷയം ഉയർത്താൻ പ്രതിപക്ഷം
ഡൽഹി: കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കണമെന്ന ആവശ്യം ഉയർത്തിയുള്ള പ്രതിഷേധം രാജ്യതലസ്ഥാനത്ത് ശക്തമായി തുടരുന്നു. മന്ത്രി രാജിവെക്കാതെ സമരം അവസാനിപ്പിക്കില്ലെന്നാണ് പ്രതിഷേധത്തിന് നേതൃത്വം നൽകുന്ന സിജെപി നേതൃത്വം വ്യക്തമാക്കിയിരിക്കുന്നത്.
രാജ്യതലസ്ഥാനത്ത് അർധരാത്രിവരെ ആയിരക്കണക്കിന് പ്രതിഷേധക്കാർ ഒത്തുകൂടി. പ്രതിഷേധക്കാരെ പിരിച്ചുവിടാൻ പൊലീസ് ടിയർ ഗ്യാസ് പ്രയോഗിച്ചതായി റിപ്പോർട്ടുകളുണ്ട്. സുരക്ഷാ സാഹചര്യം കണക്കിലെടുത്ത് ഡൽഹിയിലെ ചില മേഖലകളിൽ നിയന്ത്രണങ്ങൾ ശക്തമാക്കിയിരിക്കുകയാണ്. പ്രധാന മെട്രോ സ്റ്റേഷനുകളിൽ നിയന്ത്രണങ്ങൾ ഏർപ്പെടുത്താനും ചില പ്രദേശങ്ങളിൽ ഇന്റർനെറ്റ് നിയന്ത്രണം തുടരാനും നടപടികളുണ്ടെന്നാണ് വിവരം.
സമരം അവസാനിപ്പിക്കുന്നതിന് കേന്ദ്രസർക്കാരും പ്രതിഷേധ പ്രതിനിധികളും തമ്മിൽ നടത്തിയ രണ്ടാംഘട്ട ചർച്ചയിൽ ധാരണയിലെത്താനായില്ല. ഇതോടെ തുടർചർച്ചകളുടെ കാര്യത്തിൽ അനിശ്ചിതത്വം നിലനിൽക്കുകയാണ്.
വിദ്യാർഥികൾക്കെതിരെ പൊലീസ് അതിക്രമം നടന്നതായി ആരോപിച്ച് കുറ്റക്കാർക്കെതിരെ നടപടി സ്വീകരിക്കണമെന്ന് പ്രതിപക്ഷ നേതാവ് രാഹുൽ ഗാന്ധി ആവശ്യപ്പെട്ടു. അതേസമയം, പ്രതിപക്ഷം വിഷയത്തെ രാഷ്ട്രീയവൽക്കരിക്കുകയാണെന്ന് ജെ.പി. നഡ്ഡ പ്രതികരിച്ചു.
നീറ്റ് പരീക്ഷയുമായി ബന്ധപ്പെട്ട ആരോപണങ്ങളും വിദ്യാർഥികൾക്ക് നേരെയുണ്ടായ ലാത്തിച്ചാർജ് സംഭവവും പാർലമെന്റിന്റെ ഇരുസഭകളിലും ഇന്ന് വീണ്ടും ഉന്നയിക്കുമെന്ന് പ്രതിപക്ഷം അറിയിച്ചു. വിദ്യാഭ്യാസ മന്ത്രി രാജിവെക്കണമെന്ന ആവശ്യത്തിൽ പ്രതിപക്ഷം ഉറച്ചുനിൽക്കുകയാണ്. സഭാനടപടികൾ നിർത്തിവെച്ച് ഈ വിഷയങ്ങൾ ചർച്ച ചെയ്യണമെന്നാവശ്യപ്പെട്ട് പ്രതിപക്ഷ എംപിമാർ നോട്ടീസും നൽകിയിട്ടുണ്ട്.
ഇതിനിടെ, പ്രതിഷേധക്കാർക്കെതിരെ കേസുകളോ മറ്റ് നിയമനടപടികളോ സ്വീകരിക്കില്ലെന്ന് കേന്ദ്രസർക്കാർ ഉറപ്പ് നൽകിയാൽ താൻ നിരാഹാര സമരം അവസാനിപ്പിക്കാൻ തയ്യാറാണെന്ന് സാമൂഹിക പ്രവർത്തകൻ സോനം വാങ്ചുക് അറിയിച്ചിരുന്നു. അത്തരം സാഹചര്യമുണ്ടായാൽ സമരം താൽക്കാലികമായി നിർത്തിവെച്ച് സർക്കാരുമായി ചർച്ച നടത്തണമെന്ന് പ്രതിഷേധക്കാരോട് അഭ്യർഥിക്കുമെന്നും അദ്ദേഹം വ്യക്തമാക്കിയിരുന്നു.
എന്നാൽ, സോനം വാങ്ചുക്കിന്റെ ഈ നിർദേശത്തോട് സിജെപി വിയോജിപ്പ് പ്രകടിപ്പിച്ചു. വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കുന്നതുൾപ്പെടെ തങ്ങൾ മുന്നോട്ടുവച്ച ആവശ്യങ്ങൾ സർക്കാർ അംഗീകരിക്കുന്നതുവരെ പ്രതിഷേധം തുടരുമെന്നാണ് സി ജെ പി നിലപാട്.
