0:00
മലമ്പുഴയിൽ കാട്ടാന ആക്രമണം: റിട്ട. ആശുപത്രി ജീവനക്കാരൻ മരിച്ചു
പാലക്കാട്: മലമ്പുഴയിൽ കാട്ടാന ആക്രമണത്തിൽ ഒരാൾ മരിച്ചു. വെള്ളെഴുത്താംപൊറ്റ കോളനി നിവാസിയും മലമ്പുഴ ഗവൺമെന്റ് ആശുപത്രിയിലെ റിട്ടയേർഡ് അറ്റൻഡറുമായ എ. ചന്ദ്രനാണ് മരിച്ചത്.
ചന്ദ്രൻ മറ്റ് രണ്ട് സുഹൃത്തുക്കൾക്കൊപ്പം വീടിന് സമീപമുള്ള പുളിമരത്തിന് താഴെ കിടന്നുറങ്ങുന്നതിനിടെയാണ് പുലർച്ചെയോടെ പ്രദേശത്ത് കാട്ടാന എത്തിയത്. ആനയുടെ ശബ്ദവും ബഹളവും കേട്ട് മൂന്നുപേരും എഴുന്നേറ്റ് ഓടി രക്ഷപ്പെടാൻ ശ്രമിച്ചെങ്കിലും ചന്ദ്രന് രക്ഷപ്പെടാനായില്ല.
കാട്ടാനയുടെ ആക്രമണത്തിലാണ് ചന്ദ്രൻ മരിച്ചതെന്നാണ് പ്രാഥമിക വിവരം. മൃതദേഹം പോസ്റ്റ്മോർട്ടത്തിനായി ജില്ലാ ആശുപത്രിയിലേക്ക് മാറ്റി.
സംഭവത്തെ തുടർന്ന് പ്രദേശത്ത് ഭീതി നിലനിൽക്കുകയാണ്. വനമേഖലയോട് ചേർന്ന പ്രദേശങ്ങളിൽ രാത്രികാലങ്ങളിൽ കൂടുതൽ ജാഗ്രത വേണമെന്ന ആവശ്യവും നാട്ടുകാർ ഉയർത്തുന്നു.
