72 കാരിയായ രോഗിയോട് അപമാനകരമായ പെരുമാറ്റം; സ്വകാര്യ ക്ലിനിക്കിനെതിരെ മുഖ്യമന്ത്രിക്കും ആരോഗ്യ മന്ത്രിക്കും ഉൾപ്പെടെ പരാതി
കാസർഗോഡ്: ചികിത്സ തേടി എത്തിയ 72 കാരിയായ വയോജന രോഗിയോട് അപമാനകരമായി പെരുമാറുകയും ചെരുപ്പ് പുറത്തുവെച്ച് മാത്രം പ്രവേശിക്കണമെന്ന് നിർബന്ധിക്കുകയും ചെയ്തതായി ആരോപിച്ച് കാസർഗോഡിലെ ഒരു സ്വകാര്യ ക്ലിനിക്കിനെതിരെ മുഖ്യമന്ത്രിക്കും ആരോഗ്യ വകുപ്പ് മന്ത്രിക്കും ഉൾപ്പെടെ വിവിധ അധികാരികൾക്ക് പരാതി നൽകി.
പയ്യോളി സ്വദേശിയായ നബീസയ്ക്ക് (72) നേരിട്ട ദുരനുഭവത്തെ തുടർന്ന് പരാതി നൽകിയത്. കാസർഗോഡിലെ സ്വസ്ഥ്യ ഹോമിയോപ്പതി ക്ലിനിക് ആൻഡ് ഡെന്റൽ സ്പെഷ്യാലിറ്റി ക്ലിനിക്കിൽ ചികിത്സയ്ക്കായി എത്തിയപ്പോഴാണ് സംഭവം ഉണ്ടായതെന്ന് പരാതിയിൽ പറയുന്നു.
ജൂൺ 5-ന് വൈകുന്നേരം ചികിത്സ തേടി ക്ലിനിക്കിലെത്തിയ നബീസയിൽ നിന്ന് ചികിത്സാ ഫീസ് സ്വീകരിക്കുകയും പേര് രജിസ്റ്റർ ചെയ്യുകയും ചെയ്ത ശേഷം, ചെരുപ്പ് പുറത്തുവെച്ച് മാത്രമേ അകത്ത് പ്രവേശിക്കാൻ കഴിയൂ എന്ന് ജീവനക്കാർ അറിയിച്ചതായാണ് പരാതി. ഇതിന്റെ നിയമപരമായ അടിസ്ഥാനത്തെക്കുറിച്ച് ചോദിച്ചപ്പോൾ ജീവനക്കാർ ധാർഷ്ട്യപരവും അപമാനകരവുമായ സമീപനമാണ് സ്വീകരിച്ചതെന്നും പരാതിയിൽ പറയുന്നു.
72 വയസ്സുള്ള ഒരു വയോജന രോഗിക്ക് യാതൊരു സുരക്ഷാ സംവിധാനവും ഒരുക്കാതെ വെറുംകാലോടെ നടക്കാൻ നിർബന്ധിച്ചത് രോഗിസുരക്ഷയ്ക്കും ആരോഗ്യ ശുചിത്വ മാനദണ്ഡങ്ങൾക്കും വിരുദ്ധമാണെന്ന് പരാതിക്കാരൻ ചൂണ്ടിക്കാട്ടുന്നു. രോഗികൾക്ക് പകരം ഉപയോഗിക്കാവുന്ന സുരക്ഷാ സംവിധാനങ്ങൾ നൽകാതെയാണ് ഇത്തരമൊരു നിബന്ധന നടപ്പിലാക്കിയതെന്നും പരാതിയിൽ പറയുന്നു.
സംഭവത്തിൽ സമഗ്ര അന്വേഷണം നടത്തി ഉത്തരവാദികൾക്കെതിരെ നടപടി സ്വീകരിക്കണമെന്ന് ആവശ്യപ്പെട്ട് മുഖ്യമന്ത്രി, ആരോഗ്യ വകുപ്പ് മന്ത്രി, കാസർഗോഡ് ജില്ലാ കളക്ടർ, ജില്ലാ മെഡിക്കൽ ഓഫീസർ, ജില്ലാ ഉപഭോക്തൃ തർക്ക പരിഹാര കമ്മീഷൻ എന്നിവർക്കാണ് പരാതി നൽകിയത്.
ക്ലിനിക്കിന്റെ പ്രവർത്തനം, ലൈസൻസ് വ്യവസ്ഥകൾ, രോഗിസുരക്ഷാ മാനദണ്ഡങ്ങൾ, രോഗികളോടുള്ള സമീപനം എന്നിവ പരിശോധിക്കണമെന്നും പരാതിയിൽ ആവശ്യപ്പെട്ടിട്ടുണ്ട്. കൂടാതെ ഭാവിയിൽ മറ്റ് രോഗികൾക്ക് സമാനമായ ബുദ്ധിമുട്ടുകളും അപമാനങ്ങളും നേരിടേണ്ട സാഹചര്യം ഒഴിവാക്കാൻ ആവശ്യമായ നടപടികൾ സ്വീകരിക്കണമെന്നും പരാതിക്കാരൻ ആവശ്യപ്പെട്ടു.
സംഭവവുമായി ബന്ധപ്പെട്ട് വിവരാവകാശ നിയമപ്രകാരം ക്ലിനിക്കിന്റെ ലൈസൻസ്, പരിശോധന റിപ്പോർട്ടുകൾ, ആരോഗ്യ വകുപ്പ് നടത്തിയ പരിശോധനകൾ, ലഭിച്ച പരാതികൾ എന്നിവ സംബന്ധിച്ച വിവരങ്ങളും ആവശ്യപ്പെട്ട് ബന്ധപ്പെട്ട അധികാരികൾക്ക് അപേക്ഷ സമർപ്പിച്ചതായും അറിയിച്ചു.
പരാതിയിൽ ആരോഗ്യ വകുപ്പിന്റെയും ജില്ലാ ഭരണകൂടത്തിന്റെയും അടിയന്തര ഇടപെടൽ ആവശ്യപ്പെട്ടിട്ടുണ്ട്. ക്ലിനിക്കിനെതിരായ പരാതിയിൽ അന്വേഷണം നടത്തി നിയമാനുസൃത നടപടികൾ സ്വീകരിക്കുമോയെന്നത് കാത്തിരുന്ന് കാണേണ്ടതുണ്ട്.
