സമസ്ത ജനറൽ സെക്രട്ടറി പ്രഫ. കെ. ആലിക്കുട്ടി മുസ്‌ലിയാർ അന്തരിച്ചു
പെരിന്തൽമണ്ണ: സമസ്ത കേരള ജംഇയ്യത്തുല്‍ ഉലമ ജനറൽ സെക്രട്ടറി പ്രഫ. കെ. ആലിക്കുട്ടി മുസ്‌ലിയാർ (75) അന്തരിച്ചു. 2016 മുതൽ സമസ്തയുടെ ജനറൽ സെക്രട്ടറിയായും 2003 മുതൽ പട്ടിക്കാട് ജാമിഅ നൂരിയ അറബിക് കോളജിന്റെ പ്രിൻസിപ്പലായും അദ്ദേഹം പ്രവർത്തിച്ചു. 2013 മുതൽ കാസർകോട് ജില്ലാ ഖാസിയുമായിരുന്നു.
നാളെ രാവിലെ 10 മണിക്കാണ് മയ്യിത്ത് നിസ്‌കാരം. വീട്ടിൽ കുളിപ്പിച്ചശേഷം കുടുംബാംഗങ്ങൾക്ക് അന്ത്യോപചാരം അർപ്പിക്കാൻ അവസരമൊരുക്കും. തുടർന്ന് തിരൂർക്കാട് അൻവാറുൽ ഇസ്‌ലാം മുറ്റത്ത് പൊതുദർശനം നടക്കും.
മത-വിദ്യാഭ്യാസ രംഗങ്ങളിൽ ദീർഘകാലം സജീവമായിരുന്ന അദ്ദേഹം കേരള ഹജ്ജ് കമ്മിറ്റി ചെയർമാൻ, ഇന്ത്യ ഹജ്ജ് കമ്മിറ്റി വൈസ് ചെയർമാൻ, സമസ്ത വിദ്യാഭ്യാസ ബോർഡ് വൈസ് പ്രസിഡന്റ്, സുപ്രഭാതം ദിനപത്രം ചെയർമാൻ തുടങ്ങിയ നിലകളിലും സേവനമനുഷ്ഠിച്ചു. നിരവധി ഗ്രന്ഥങ്ങളുടെ രചയിതാവും അന്താരാഷ്ട്ര ഇസ്‌ലാമിക സമ്മേളനങ്ങളിൽ ഇന്ത്യയെ പ്രതിനിധീകരിച്ച പണ്ഡിതനുമായിരുന്നു.
