ചെന്നൈ: കരൂര് ദുരന്തത്തില് സമഗ്ര അന്വേഷണം ആവശ്യപ്പെട്ട് സുപ്രിംകോടതിയെ സമീപിച്ച് തമിഴക വെട്രി കഴകം. ഹൈക്കോടതിയുടെ ഉത്തരവുപ്രകാരം നിയോഗിച്ച എസ്ഐടിയുടെ അന്വേഷണം അംഗീകരിക്കില്ലെന്നും സ്വതന്ത്രമായ അന്വേഷണം വേണമെന്നും ഹരജിയില് പറയുന്നു. ഹരജി അടിയന്തരമായി പരിഗണിക്കണമെന്ന് ടിവികെ ആവശ്യപ്പെട്ടു.
അതേസമയം, കരൂര് സന്ദര്ശിക്കാന് അനുമതി ആവശ്യപ്പെട്ട് വിജയ് ഡിജിപിക്ക് മെയില് അയച്ചു. കരൂര് ദുരന്തത്തില് മരിച്ചവരുടെ കുടുംബാംഗങ്ങളുമായി വിജയ് കഴിഞ്ഞ ദിവസം സംസാരിച്ചത്. ചെന്നൈയിലെ വീട്ടില് നിന്ന് വീഡിയോ കോളിലൂടെയാണ് വിജയ് സംസാരിച്ചത്. 15 മിനിറ്റിലധികം ഓരോരുത്തരോടും സംസാരിച്ച വിജയ്, കുടുംബത്തിനൊപ്പം എന്നും ഉണ്ടാകുമെന്നും ഉടന് നേരില് കാണുമെന്നും ഉറപ്പ് നല്കി. വീഡിയോ കോള് ചെയ്യുന്നതിന്റെ ചിത്രങ്ങളോ ദൃശ്യങ്ങളോ എടുക്കരുതെന്ന് വിജയ് ആവശ്യപ്പെട്ടതായാണ് സൂചന.
വിജയ് ഫോണില് വിളിക്കുമെന്ന് ടിവികെ പ്രവര്ത്തകര് കുടുംബാംഗങ്ങളെ നേരത്തെ അറിയിച്ചിരുന്നു. നടക്കാന് പാടില്ലാത്തത് സംഭവിച്ചെന്നും കുടുംബത്തിന്റെ നഷ്ടം പരിഹരിക്കാനാകില്ലെന്നും വിജയ് പറഞ്ഞു. അപകടം ഉണ്ടായി ഒന്പതാം ദിവസമാണ് വിജയ് കുടുംബാംഗങ്ങളുമായി നേരിട്ട് ബന്ധപ്പെടുന്നത്. ടിവികെ ജനറല് സെക്രട്ടറി അരുണ് രാജിന്റെ നേതൃത്വത്തിലുള്ള സംഘം കരൂരില് ഉണ്ടെന്നാണ് വിവരം. വിജയ് കരൂരിലേക്ക് എന്ന് പോകുമെന്ന കാര്യത്തില് സ്ഥിരീകരണമില്ല
സിപിഎം-കോണ്ഗ്രസ് സംഘര്ഷം; പോലിസ് ലാത്തി വീശി; ഷാഫി പറമ്പില് എംപിക്ക് പരിക്ക്
കോഴിക്കോട്: പേരാമ്പ്രയില് സിപിഎം-കോണ്ഗ്രസ് പ്രവര്ത്തകര് തമ്മില് ഏറ്റുമുട്ടി. പോലിസ് ലാത്തിവീശുകയും കണ്ണീര്വാതകം പ്രയോഗിക്കുകയും ചെയ്തു. ഷാഫി പറമ്പില് എംപി അടക്കമുള്ള യുഡിഎഫ് പ്രവര്ത്തകര്ക്ക് പരിക്കേറ്റു. ഡിവൈഎസ്പി അടക്കമുള്ള പോലീസുകാര്ക്കും പരിക്കുണ്ട്. ചുണ്ടിന് പരിക്കേറ്റ ഷാഫിയെ കോഴിക്കോട്ടെ സ്വകാര്യ ആശുപത്രിയില് പ്രവേശിപ്പിച്ചു.
പേരാമ്പ്ര സികെജി കോളേജില് ചെയര്മാന് സ്ഥാനം വിജയിച്ചതിലുള്ള യുഡിഎസ്എഫിന്റെ വിജയാഹ്ലാദപ്രകടനം പോലിസ് തടഞ്ഞതിനെ തുടര്ന്ന് പേരാമ്പ്ര ടൗണില് കഴിഞ്ഞ ദിവസം സംഘര്ഷമുണ്ടായിരുന്നു. ഇതില് നിരവധി പ്രവര്ത്തകര്ക്ക് പരിക്കേറ്റിരുന്നു. ഇതേത്തുടര്ന്ന് പേരമ്പ്രയില് യുഡിഎഫ് ഹര്ത്താല് പ്രഖ്യാപിച്ചിരുന്നു. ഇതിന്റെ ഭാഗമായി ഇന്ന് യുഡിഎഫ് പ്രകടനം നടത്താനും തീരുമാനിച്ചിരുന്നു. ഹര്ത്താലിനിടെ പേരാമ്പ്ര പഞ്ചായത്ത് പ്രസിഡന്റ് വി കെ പമോദിന് മര്ദനമേറ്റതായി ആരോപിച്ച് സിപിഎമ്മും പ്രകടനം നടത്താന് തീരുമാനിച്ചു. ഒരേസമയം രണ്ട് പ്രകടനങ്ങളും നേര്ക്കുനേര് വന്നതോടെയാണ് പോലീസ് ലാത്തി വീശുകയും കണ്ണീര്വാതകം പ്രയോഗിക്കുകയും ചെയ്തത്. ഇതിനിടെ പോലിസിന് നേരെ കല്ലേറും ഉണ്ടായി. സംഘര്ഷാവസ്ഥ നിലനില്ക്കുന്നതിനാല് വന് പോലിസ് സംഘം പ്രദേശത്ത് ക്യാംപ് ചെയ്യുന്നുണ്ട്
