നിതിൻ രാജ് മരണത്തിൽ പ്രതിഷേധ ഹർത്താൽ ശക്തം; പാലക്കാട് ഉൾപ്പെടെ പലയിടങ്ങളിൽ ഗതാഗത തടസം
പാലക്കാട്/തിരുവനന്തപുരം: മെഡിക്കൽ വിദ്യാർത്ഥിയായ നിതിൻ രാജിന്റെ മരണത്തിൽ പ്രതിഷേധിച്ച് സംസ്ഥാനത്ത് ആഹ്വാനം ചെയ്ത ഹർത്താൽ വിവിധ ജില്ലകളിൽ ശക്തമായി തുടരുന്നു. തലസ്ഥാനമായ തിരുവനന്തപുരം മുതൽ പാലക്കാട് വരെയുള്ള നിരവധി പ്രദേശങ്ങളിൽ സമരാനുകൂലികൾ റോഡിലിറങ്ങി വാഹനങ്ങൾ തടഞ്ഞതോടെ ഗതാഗതം ഭാഗികമായി നിലച്ചു.
പാലക്കാട് സ്റ്റേഡിയം ബസ് സ്റ്റാൻഡിന് മുന്നിൽ സമരാനുകൂലികൾ റോഡിൽ ഇരുന്ന് പ്രതിഷേധിച്ചതിനെ തുടർന്ന് ഗതാഗതം കുറച്ചുസമയം തടസ്സപ്പെട്ടു. പിന്നീട് പൊലീസ് സ്ഥലത്തെത്തി സമരക്കാരുമായി സംസാരിച്ച് സ്ഥിതി നിയന്ത്രണവിധേയമാക്കി.
തിരുവനന്തപുരം, അടൂർ, നെടുമങ്ങാട്, കണ്ണൂർ പഴയങ്ങാടി തുടങ്ങിയ കേന്ദ്രങ്ങളിലും ഹർത്താൽ അനുകൂലികൾ വാഹനങ്ങൾ തടഞ്ഞു. ചില ഇടങ്ങളിൽ കെഎസ്ആർടിസി ബസുകൾ തടയാൻ ശ്രമിച്ച സമരക്കാരെ പൊലീസ് ബലം പ്രയോഗിച്ച് നീക്കി. ഇടുക്കി ജില്ലയിലും പല ഭാഗങ്ങളിൽ ഗതാഗത തടസ്സം അനുഭവപ്പെട്ടു. അതേസമയം, ഇരുചക്ര വാഹനങ്ങളെ പല സ്ഥലങ്ങളിലും കടത്തിവിട്ടു.
തിരുവനന്തപുരം മേഖലയിൽ ആശുപത്രിയിലേക്ക് പോകേണ്ടിയിരുന്ന ഒരു സ്ത്രീയെ പൊലീസ് സഹായത്തോടെ ജീപ്പിൽ ആശുപത്രിയിലെത്തിച്ച സംഭവവും ശ്രദ്ധേയമായി. രാവിലെ ആറുമണിക്കാണ് ഹർത്താൽ ആരംഭിച്ചത്.
അതേസമയം, കോഴിക്കോട് ജില്ലയിൽ ഹർത്താൽ വലിയ രീതിയിൽ ബാധിച്ചില്ല. സ്വകാര്യ ബസുകൾ ഉൾപ്പെടെ ഗതാഗതം സാധാരണ നിലയിൽ തുടരുകയും വ്യാപാര സ്ഥാപനങ്ങൾ പലതും തുറന്നുകിടക്കുകയും ചെയ്തു.
നിതിൻ രാജിന്റെ കൊലയാളികളെ ഉടൻ അറസ്റ്റ് ചെയ്യുക, രോഹിത് വെമുല നിയമം നടപ്പാക്കുക, കുടുംബത്തിന് പത്ത് കോടി രൂപ നഷ്ടപരിഹാരം നൽകുക, ബന്ധപ്പെട്ട ഡെന്റൽ കോളജിന്റെ അഫിലിയേഷൻ റദ്ദാക്കുക തുടങ്ങിയ ആവശ്യങ്ങളുന്നയിച്ചാണ് ഹർത്താൽ സംഘടിപ്പിച്ചിരിക്കുന്നത്. ദളിത്-ആദിവാസി സംഘടനകളുടെ കൂട്ടായ്മയും ‘ജസ്റ്റിസ് ഫോർ നിതിൻ രാജ്’ ആക്ഷൻ കൗൺസിലുമാണ് സമരത്തിന് നേതൃത്വം നൽകുന്നത്.
ഹർത്താലിനെതിരെ വ്യാപാരി വ്യവസായി ഏകോപന സമിതി നിലപാട് പ്രഖ്യാപിച്ചിരുന്നുവെങ്കിലും സംസ്ഥാനത്തിന്റെ പല ഭാഗങ്ങളിലും കടകൾ അടഞ്ഞുകിടക്കുകയും ഗതാഗതം ഭാഗികമായി ബാധിക്കപ്പെടുകയും ചെയ്തു. പൊതുവെ ചില ഇടങ്ങളിലെ സംഘർഷങ്ങൾ ഒഴിച്ചാൽ സ്ഥിതി സമാധാനപരമായിരുന്നുവെന്നാണ് പൊലീസ് അറിയിച്ചത്.
