പാലക്കാട് നഗരമധ്യത്തിൽ വൻ തീപിടിത്തം; ഫ്ലാറ്റുകൾക്ക് ഭീഷണി, വൻ ദുരന്തം ഒഴിവായി
പാലക്കാട്: നഗരമധ്യത്തിലെ നരികുത്തിയിൽ വൻ തീപിടിത്തം ഉണ്ടായി. സർക്കാർ മൃഗാശുപത്രിക്ക് സമീപവും മുനിസിപ്പൽ ബസ് സ്റ്റാൻഡിന് സമീപത്തുമായ പറമ്പിലാണ് തീ പടർന്നത്. പഴക്കച്ചവടവുമായി ബന്ധപ്പെട്ട ഗോഡൗണായി ഉപയോഗിച്ചിരുന്ന സ്ഥലത്താണ് സംഭവം ഉണ്ടായത്.
പ്ലാസ്റ്റിക് സാധനങ്ങൾ, കടലാസ് പെട്ടികൾ ഉൾപ്പെടെയുള്ള മാലിന്യങ്ങൾ കൂപ്പികൂട്ടി സൂക്ഷിച്ചിരുന്ന പറമ്പിൽ നിന്നാണ് തീ ഉയർന്നത്. കനത്ത ചൂട് തുടരുന്ന സാഹചര്യത്തിൽ മാലിന്യങ്ങൾ കത്തിച്ചതാകാം തീപിടിത്തത്തിന് കാരണമെന്ന പ്രാഥമിക നിഗമനമാണ്. സംഭവസ്ഥലത്ത് നിന്ന് കനത്ത കറുത്ത പുക ഉയർന്ന് പരിസര പ്രദേശങ്ങൾ മുഴുവൻ മൂടി.
തീ വേഗത്തിൽ പടർന്നതോടെ സമീപത്തെ ഫ്ലാറ്റുകളിലേക്ക് അപകടഭീഷണി ഉയർന്നു. നാട്ടുകാർ ആശങ്കയിൽ കഴിയുന്നതിനിടെ അഗ്നിശമന സേനയുടെ നിരവധി യൂണിറ്റുകൾ സ്ഥലത്തെത്തി രക്ഷാപ്രവർത്തനം ആരംഭിച്ചു. മേൽപ്പാലത്തിന് മുകളിൽ നിന്ന് താഴേക്ക് പടർന്ന തീ നിയന്ത്രണവിധേയമാക്കാൻ പ്രത്യേക ശ്രമങ്ങളും നടത്തി.
തീ പിന്നീട് നിയന്ത്രണവിധേയമാക്കാനായതോടെ വലിയ ദുരന്തം ഒഴിവായി. തീപിടിത്തത്തിൽ സമീപ ഫ്ലാറ്റിന്റെ ഒരു വശം കരിഞ്ഞ നിലയിലാണ്. ആളപായമൊന്നും റിപ്പോർട്ട് ചെയ്തിട്ടില്ല.
സംഭവത്തിന്റെ കൃത്യമായ കാരണം വ്യക്തമല്ലെങ്കിലും, അഗ്നിശമനസേനയുടെ സമയോചിതവും സംയോജിതവുമായ ഇടപെടലാണ് വലിയ അപകടം ഒഴിവാക്കാൻ സഹായിച്ചതെന്നാണ് വിലയിരുത്തൽ. നഗരത്തിലെ ജനവാസമേഖലയിലുണ്ടായ ഈ തീപിടിത്തം സുരക്ഷാ മാനദണ്ഡങ്ങളെക്കുറിച്ചുള്ള ആശങ്കകൾക്കും ഇടയാക്കി.
