0:00
വീട്ടിനകത്ത് കളിക്കുന്നതിനിടെ പാമ്പുകടി; ചികിത്സയിലിരുന്ന കുട്ടി മരിച്ചു
പാലക്കാട്: വീട്ടിനകത്ത് കളിച്ചുകൊണ്ടിരിക്കെ പാമ്പുകടിയേറ്റ കുട്ടി ചികിത്സയിലിരിക്കെ മരിച്ചു. നെന്മാറ ചക്കാത്തറയിൽ രാമൻ – അംബിക ദമ്പതികളുടെ മകൾ രാജേശ്വരി ആണ് മരിച്ചത്.
കഴിഞ്ഞ മെയ് 14-ന് ഉച്ചയ്ക്കാണ് സംഭവം. വീടിനകത്ത് ഒറ്റയ്ക്ക് കളിച്ചുകൊണ്ടിരിക്കെയായിരുന്നു മൂർഖന്റെ കടിയേറ്റത്. സംഭവസമയത്ത് വീട്ടിൽ മറ്റാരും ഉണ്ടായിരുന്നില്ല.
വൈകീട്ട് ജോലി കഴിഞ്ഞ് വീട്ടിലെത്തിയ പിതൃസഹോദരനും ഭാര്യയും കുട്ടിയെ വായിൽ നുരയും പതയും വന്ന നിലയിൽ ബോധരഹിതയായി കണ്ടെത്തുകയായിരുന്നു. തുടർന്ന് ഉടൻ നെന്മാറ സർക്കാർ ആശുപത്രിയിലും പിന്നീട് ആലത്തൂരിലെ സ്വകാര്യ ആശുപത്രിയിലും പ്രവേശിപ്പിച്ചെങ്കിലും ആരോഗ്യനില അതീവ ഗുരുതരമായിരുന്നു.
ദിവസങ്ങളായി ചികിത്സയിൽ തുടരുന്നതിനിടെയാണ് ഇന്ന് രാജേശ്വരി മരണത്തിന് കീഴടങ്ങിയത്. കുട്ടിയുടെ വേർപാട് പ്രദേശത്ത് ദുഃഖമുണർത്തി.
