മുസ്ലിം ലീഗിൽ വിഭാഗീയത രൂക്ഷം; കരിപ്പൂർ മേഖലാ ഓഫീസ് അടച്ചുപൂട്ടി പ്രതിഷേധം
മലപ്പുറം: മലപ്പുറം ജില്ലയിലെ പള്ളിക്കൽ പഞ്ചായത്തിൽ മുസ്ലിം ലീഗിനുള്ളിൽ വിഭാഗീയത രൂക്ഷമായി. കരിപ്പൂർ മേഖല മുസ്ലിം ലീഗ് ഓഫീസിന് പ്രവർത്തകർ നാല് പൂട്ടിട്ട് അടച്ചുപൂട്ടി പ്രതിഷേധം രേഖപ്പെടുത്തി. പഞ്ചായത്ത് തെരഞ്ഞെടുപ്പുമായി ബന്ധപ്പെട്ടുണ്ടായ തർക്കങ്ങളാണ് പ്രതിഷേധത്തിന് കാരണമായത്.
പഞ്ചായത്തിലെ 11-ാം വാർഡിൽ നടന്ന തെരഞ്ഞെടുപ്പുമായി ബന്ധപ്പെട്ട സ്ഥാനാർഥി നിർണയത്തിൽ ഗുരുതരമായ അനീതിയുണ്ടായെന്ന ആരോപണമാണ് പ്രതിഷേധത്തിന് അടിസ്ഥാനം. വോട്ടെടുപ്പിലൂടെ തെരഞ്ഞെടുക്കപ്പെട്ട സ്ഥാനാർഥിയെ മണ്ഡലം കമ്മറ്റി മാറ്റിയെന്നാണ് പ്രവർത്തകർ ആരോപിക്കുന്നത്. ഇതുമൂലം പാർട്ടിയിലെ ജനാധിപത്യ നടപടികൾ അട്ടിമറിക്കപ്പെട്ടതായി പ്രവർത്തകർ പറയുന്നു.
11-ാം വാർഡിൽ മുസ്ലിം ലീഗ് സ്ഥാനാർഥി 22 വോട്ടുകൾക്ക് പരാജയപ്പെട്ടിരുന്നു. സ്ഥാനാർഥി മാറ്റിയതിന്റെ പ്രതികൂല ഫലമാണ് തെരഞ്ഞെടുപ്പിൽ തിരിച്ചടിയായതെന്നും ഇത് പാർട്ടിയുടെ പ്രതിഛായയ്ക്ക് ക്ഷതം വരുത്തിയെന്നും പ്രതിഷേധക്കാർ ആരോപിച്ചു.
പ്രശ്നത്തിൽ മണ്ഡലം നേതൃത്വത്തിനെതിരെ ശക്തമായ പ്രതിഷേധമാണ് ഉയരുന്നത്. മണ്ഡലം പ്രസിഡന്റ് വി.പി. അബ്ദുൽ ഹമീദ് നേതൃത്വം നൽകുന്ന ‘ജനമുന്നേറ്റ യാത്ര’യ്ക്ക് കരിങ്കൊടി കാണിച്ച് പ്രതിഷേധം സംഘടിപ്പിക്കുമെന്ന് പ്രവർത്തകർ അറിയിച്ചു. നേതൃത്വത്തിന്റെ ഏകപക്ഷീയ തീരുമാനങ്ങൾ അവസാനിപ്പിക്കണമെന്നാവശ്യപ്പെട്ടാണ് പ്രതിഷേധം ശക്തമാക്കുന്നതെന്ന് അവർ വ്യക്തമാക്കി.
സംഭവം പാർട്ടിയിൽ കൂടുതൽ ആശങ്ക സൃഷ്ടിച്ചിരിക്കുകയാണ്. വിഭാഗീയത തുടർന്നാൽ സംഘടനാ പ്രവർത്തനം തന്നെ തകരാറിലാകുമെന്ന് മുന്നറിയിപ്പ് നൽകുന്ന പ്രവർത്തകർ, വിഷയത്തിൽ സംസ്ഥാന നേതൃത്വം ഇടപെടണമെന്നും ആവശ്യപ്പെട്ടു.
