ഇ അബൂബക്കറിന്റെ മോചനം ആവശ്യപ്പെട്ട് 37 മനുഷ്യാവകാശ സംഘടനകള്
ന്യൂഡല്ഹി: ഇ അബൂബക്കറിന്റെ ജയില് മോചനം ആവശ്യപ്പെട്ട് 37 മനുഷ്യാവകാശ സംഘടനകള്. മൂന്നര വര്ഷത്തിലേറെയായി ജയിലില് കഴിയുന്ന ഇ അബൂബക്കറിന്റെ(72) ആരോഗ്യനിലയില് ആശങ്കയുണ്ടെന്നും മാനുഷികവും ആരോഗ്യപരവുമായ കാരണങ്ങളാല് അദ്ദേഹത്തെ ഉടന് മോചിപ്പിക്കണമെന്നും 37ഓളം മനുഷ്യാവകാശ സംഘടനകളുടെ കൂട്ടായ്മയായ കാംപയ്ന് എഗൈന്സ്റ്റ് സ്റ്റേറ്റ് റിപ്രഷന്(സിഎഎസ്ആര്) ആവശ്യപ്പെട്ടു. ‘ഇന്ത്യന് ഭരണകൂടം മറ്റൊരു രാഷ്ട്രീയ തടവുകാരനെ കൂടി കൊലപ്പെടുത്താന് ഞങ്ങള് ആഗ്രഹിക്കുന്നില്ല’ എന്ന് സിഎഎസ്ആര് പത്രക്കുറിപ്പില് പറഞ്ഞു.കടുത്ത നെഞ്ചുവേദനയും തുടര്ച്ചയായ ചുമയും രക്തസമ്മര്ദ്ദത്തിലും പഞ്ചസാരയുടെ അളവിലും അപകടകരമായ ഏറ്റക്കുറച്ചിലുകളും ഉള്ളതിനാല് അബൂബക്കറിന്റെ ആരോഗ്യനില കഴിഞ്ഞ ദിവസങ്ങളില് വഷളായി. രക്തത്തിലെ ഓക്സിജന്റെ അളവും കുറഞ്ഞിട്ടുണ്ട്. ഇത് കാരണം ജയില് അധികൃതര് കഴിഞ്ഞ ദിവസം അദ്ദേഹത്തെ ന്യൂഡല്ഹിയിലെ ദീന് ദയാല് ഉപാധ്യായ ആശുപത്രിയില് ചികില്സയ്ക്കായി പ്രവേശിപ്പിച്ചിരുന്നു. ഗുരുതരാവസ്ഥയിലുള്ള ഇ അബൂബക്കറിനെ ജയിലില് പാര്പ്പിക്കുന്നത് ‘രാഷ്ട്രീയ തടവുകാരുടെ ആരോഗ്യത്തോടും അന്തസിനോടുമുള്ള അധികാരികളുടെ അവഗണന’ എന്ന് സംഘടന വിശേഷിപ്പിച്ചു.””വിരമിച്ച സ്കൂള് അദ്ധ്യാപകനും പത്രപ്രവര്ത്തകനും ആക്ടിവിസ്റ്റുമായ അബൂബക്കര് നിലവില് വിചാരണത്തടവുകാരനാണ്, ഗുരുതരമായ ആരോഗ്യസ്ഥിതികള്ക്കിടയിലും അദ്ദേഹം ജയില്വാസം തുടരുന്നതില് ആശങ്കയുണ്ടെന്നും അവര് പറഞ്ഞു. പോപ്പുലര് ഫ്രണ്ട് ഓഫ് ഇന്ത്യയുടെ സ്ഥാപക ചെയര്മാനായ എരപ്പുങ്കല് അബൂബക്കര്, അന്നനാളത്തിലെ കാര്സിനോമയ്ക്ക് ശസ്ത്രക്രിയയ്ക്ക് ശേഷം വിശ്രമത്തിലായിരിക്കെ, 2022 സെപ്റ്റംബര് 22ന് പുലര്ച്ചെ വീട്ടില് നിന്ന് ദേശീയ അന്വേഷണ ഏജന്സി അറസ്റ്റ് ചെയ്തതിനെത്തുടര്ന്ന് ഏകദേശം മൂന്നര വര്ഷത്തോളമായി ജയിലില് കഴിയുകയാണ്.
അബൂബക്കര് വളരെക്കാലമായി ഒന്നിലധികം വിട്ടുമാറാത്ത രോഗങ്ങളുമായി പോരാടുകയാണ്. പാര്ക്കിന്സണ്സ്, പ്രമേഹം, കടുത്ത കാഴ്ചക്കുറവ് എന്നിവയാല് അദ്ദേഹം ബുദ്ധിമുട്ടുന്നുണ്ട്. ഗ്യാസ്ട്രോ ഈസോഫേഷ്യല് ജങ്ഷന് അഡിനോകാര്സിനോമ എന്ന അപൂര്വ മാരകമായ കാന്സറും അദ്ദേഹത്തിന് ഉണ്ടെന്ന് കണ്ടെത്തി, 2020ല് കീമോതെറാപ്പിക്കും ശസ്ത്രക്രിയയ്ക്കും വിധേയനായി എന്നും പ്രസ്താവനയില് പറയുന്നു. അദ്ദേഹത്തിന്റെ ആരോഗ്യാവസ്ഥയ്ക്ക് മെഡിക്കല് മേല്നോട്ടവും ദൈനംദിന പ്രവര്ത്തനങ്ങള്ക്ക് സഹായവും ആവശ്യമാണെന്ന് സിഎഎസ്ആര് പറഞ്ഞു.”84 വയസുള്ള ആദിവാസി അവകാശ സംരക്ഷകനായ സ്റ്റാന് സ്വാമി, മതിയായ വൈദ്യസഹായം നിഷേധിക്കപ്പെട്ടതിനെത്തുടര്ന്ന് ജുഡീഷ്യല് കസ്റ്റഡിയില് മരിച്ചതെങ്ങനെയെന്ന് ഞങ്ങള്ക്ക് മറക്കാന് കഴിയില്ലെന്നും പ്രസ്താവനയില് പറയുന്നു. ഗുരുതരാവസ്ഥയിലായിരുന്നപ്പോള് കൃത്യസമയത്ത് ചികില്സ ലഭിച്ചില്ലെന്ന് ആരോപിക്കപ്പെടുന്ന പാണ്ഡു നരോട്ടെയുടേയും ജയിലില് ശരിയായ വൈദ്യസഹായം നിഷേധിക്കപ്പെട്ടതിനെത്തുടര്ന്ന് മരിച്ച കാഞ്ചന് നനാവാരെയുടേയും മരണങ്ങളും അതില് പരാമര്ശിച്ചിട്ടുണ്ട്. ജി എന് സായിബാബ തടവിലായിരുന്നപ്പോള് അദ്ദേഹം അടിസ്ഥാന മെഡിക്കല് സൗകര്യങ്ങള്ക്കായി പോരാടിയിരുന്നുവെന്നും പ്രസ്താവനയില് പരാമര്ശിക്കുന്നുണ്ട്.
ആസൂത്രിതമായ അവഗണനയിലൂടെയും വൈദ്യസഹായം നിഷേധിക്കുന്നതിലൂടെയും രാഷ്ട്രീയ തടവുകാരെ പതുക്കെ മരണത്തിലേക്ക് തള്ളിവിടുന്ന രീതിയാണ് ഈ മരണങ്ങള് വെളിപ്പെടുത്തുന്നതെന്നും സിഎഎസ്ആര് ഓര്മിപ്പിച്ചു. അടിയന്തര നടപടി സ്വീകരിച്ചില്ലെങ്കില് അബൂബക്കറിന്റെ അവസ്ഥ സമാനമായ രീതിയിലേക്ക് നയിച്ചേക്കാമെന്നും ഇന്ന് സമൂഹം നിശബ്ദത പാലിച്ചാല്, കസ്റ്റഡി അവഗണനയിലൂടെ മറ്റൊരു രാഷ്ട്രീയ തടവുകാരന് കൊല്ലപ്പെട്ടേക്കാമെന്നും സിഎഎസ്ആര് മുന്നറിയിപ്പ് നല്കി.
മാനുഷികവും വൈദ്യപരവുമായ കാരണങ്ങളാല് അബൂബക്കറിനെ ഉടന് മോചിപ്പിക്കണമെന്നും, കാലതാമസമില്ലാതെ ശരിയായ വൈദ്യചികില്സ ഉറപ്പാക്കണമെന്നും, എല്ലാ രാഷ്ട്രീയ തടവുകാരുടേയും ജീവിക്കാനുള്ള അവകാശവും അന്തസും സംരക്ഷിക്കണമെന്നും സിഎഎസ്ആര് ആവശ്യപ്പെട്ടു. വിചാരണ തടവുകാരനായി തുടരുന്ന ഇ അബൂബക്കര് വിചാരണ ആരംഭിക്കാതെ കസ്റ്റഡിയില് തുടരുകയാണ്.
“അസോസിയേഷന് ഫോര് പ്രൊട്ടക്ഷന് ഓഫ് സിവില് റൈറ്റ്സ്, ഭീം ആര്മി, നാഷണല് അലയന്സ് ഓഫ് പീപ്പിള്സ് മൂവ്മെന്റ്സ്, പീപ്പിള്സ് വാച്ച്, മസ്ദൂര് അധികാര് സംഗതന്, ഇന്നസെന്സ് നെറ്റ്വര്ക്ക്, മറ്റ് നിരവധി സിവില് ലിബര്ട്ടീസ് ഗ്രൂപ്പുകള് എന്നിവയുള്പ്പെടെ നിരവധി സംഘടനകളുടെ കൂട്ടായ്മയാണ് കാംപയ്ന് എഗൈന്സ്റ്റ് സ്റ്റേറ്റ് റിപ്രഷന്.”
